Xalq Cəbhəsi Qəzeti logo
Xalqın səsi
ilham

Mətbuat Şurasından “Hürriyyət” qəzetinə xəbərdarlıq edib

05.10.17, 13:01
Facebook-da paylaş Twitter-da paylaş Google-da paylaş Yahoo
Bu xəbəri paylaş
 

Mətbuat Şurasının Şikayətlər üzrə Komissiyasının növbəti iclası keçirilib.
Şuradan verilən məlumata görə, iclasda müzakirə edilən ilk məsələ Milli Məclisin bir qrup deputatının “Hürriyyət” qəzetinə qarşı şikayəti olub. Bildirilib ki, cavabdeh tərəf satirik təqdimatın yol verilən hədlərini aşıb və bu da haqlı narazılıq yaradıb. Hər bir kütləvi informasiya vasitəsi mövcud səpkili material təqdim edərkən diqqətli olmalı, onun ictimai rəydə doğuracağı reaksiyanı mütləq şəkildə hesablamalıdır. Komissiya “Hürriyyət” qəzetinin bu məqama diqqətsiz yanaşdığı, müvafiq olaraq peşə prinsiplərini pozduğu qənaətinə gəlib və qəzetə xəbərdarlıq edilməsi barədə rəyə gəlib.
Azərbaycan Dövlət Pedaqoji Universitetinin rektoru Cəfər Cəfərovun “Rubrika.az”, “Cumhuriyyet.az” və “Qlobal.az” saytlarına qarşı şikayəti ilə bağlı bildirilib ki, “Rubrika.az” saytında universitetlə bağlı yayımlanmış, “Cumhuriyyet.az” və “Qlobal.az” saytlarında faktiki olaraq təkrarlanmış materialda qarşı tərəfin mövqeyi öyrənilməyib, yalnış rəy yaradılıb. Buna görə də “Rubrika.az” saytına xəbərdarlıq edilib, “Cumhuriyyet.az” və “Qlobal.az” saytlarına isə istinad materialını təqdim edərkən diqqətli yanaşmaq, gələcəkdə belə yanlışlıqlara yol verməmək tövsiyə olunub.
İclasda müzakirə edilən növbəti məsələ Kənd Təsərrüfatı Nazirliyinin Dövlət Baytarlıq Nəzarəti Xidmətinin “Qanunxeber.az” saytına qarşı şikayəti olub. Şikayətçi tərəfin təmsilçisinin iştirak etdiyi toplantıda qeyd olunub ki, komissiya üzvlərinin cavabdeh kimi göstərilən saytla ilkin müzakirə cəhdləri uğursuz alınıb. “Qanunxeber.az”da göstərilən telefon nömrələri fəaliyyətdə deyil, doğru ünvan da yoxdur. Bu isə kütləvi informasiya vasitəsi kimi nəzərdə tutulan qanuni fəaliyyətlə uyğunsuzluq təşkil edir. Məsələnin hüquqi müstəvidə mübahisələndirilməsi üçün əsaslar da var. Komissiya bütün bunları nəzərə alaraq “Qanunxeber.az” saytı ilə bağlı materialların Şuranın “Reket jurnalistika”ya qarşı mübarizə Komissiyasında araşdırılmasına dair rəyə gəlib.
Azərbaycan Dövlət Pedaqoji Universitetinin Ağcabədi filialının direktoru Mətanət Fərzəliyevanın “obyektiv.org”, “azertaym.az”, “cumhuriyyet.az” saytlarına qarşı şikayətinin müzakirəsində bildirilib ki, cavabdeh tərəflərin dəqiqləşdirilməmiş bilgiləri qabartdıqları üçün yanlışlıqlarını etiraf etmələri vacib şərtdir. Komissiya bunu əsas götürüb, eyni zamanda sözügedən saytlara gələcəkdə belə hallara yol verməməyi tövsiyəsi edib.
“Azərbaycan Uşaqları” İctimai Birliyinin sədri Kəmalə Ağazadənin “Ulu zirvə”, Sumqayıt şəhər sakini Cümşüdov Mahir Fehruz oğlunun “Dərələyəz” qəzetlərinə qarşı şikayətləri müzakirə edilərkən müraciət müəlliflərinin iddialarında doğru olmadıqlarına dair rəy çıxarılıb.

Bu xəbər oxundu
- - -