Xalq Cəbhəsi Qəzeti logo
Xalqın səsi
ilham

“Qurultayda mətbuatı narahat edən məsələlər də müzakirə ediləcək“

09.03.18, 10:50
Facebook-da paylaş Twitter-da paylaş Google-da paylaş Yahoo
Bu xəbəri paylaş
 

“Azərbaycan Respublikası jurnalistlərinin sabah keçiriləcək VII qurultayında Azərbaycan mətbuatını narahat edən məsələlər də müzakirə ediləcək".
Bunu Azərbaycan Mətbuat Şurasının sədri, millət vəkili Əflatun Amaşov Fəxri Xiyabanda jurnalistlərə açıqlamasında söyləyib. Əflatun Amaşov bildirib ki, qurultayda Azərbaycan mətbuatını narahat edən məsələlər müzakirə ediləcək, çıxış yolları axtarılacaq: “Mən qurultayın uğuruna inanıram. Azərbaycan jurnalistikası Mətbuat Şurası yaranandan bu yana uzun bir yol keçib. Şura yaranana qədər mətbuatın problemləri, jurnalistlərlə məhkəmə çəkişmələrinin sayı çox idi. Azərbaycan Mətbuat Şurası mətbuatla ictimaiyyət arasında əlaqələri müsbət məcraya yönəltdi. Bu gün mətbuatla ictimaiyyət arasında münasibətlər demək olar ki, həll olunub".
Əflatun Amaşov qeyd edib ki, medianın əsas gücü onun iqtisadi gücü ilə bağlıdır: "Biz qurultayda Azərbaycan mediasının iqtisadi gücünün artırılması yollarını müzakirə edəcəyik. Reklam bazarının genişləndirilməsi, qəzetlərin satış yerinin düzgün təşkili diqqət mərkəzində olacaq. Eyni zamanda, biz bölgə mətbuatına da diqqəti artırmalıyıq. Regionların mətbuatında çox ciddi problemlər var. İctimai fikrin formalaşmasında əsas rolu onlayn jurnalistika oynayır. Reklam bazarını düzgün qura bilməməyimizdən, həmin media vasitələri reklamdan gəlir əldə edə bilmir. Nə qədər ki, onlayn media reklamla təmin olunmayıb, dövlət tərəfindən onlara da yardım olunmalıdır. Çünki biz yardım edə bilməsək, hazırkı şəraitdə onlayn media daha çox ayrı-ayrı qrupların nəzarətində ola bilər. Bu, iqtisadi qruplar da, digər yönlü qruplar da ola bilər. Eyni zamanda, media ayrı-ayrı şəxslərin, Azərbaycanda marağı olan kənar təşkilatların nəzarətində ola bilər. Biz bütün bu məsələləri qurultayda müzakirə edəcəyik”.
Şura sədri qurultayda Azərbaycan Mətbuat Şurası sədrinin və Nəzarət-Təftiş Komissiyasının hesabatlarının dinləniləcəyini hesabat ətrafında müzakirə aparılacağını, Şuranın İdarə Heyətinin yeni tərkibinin seçiləcəyini söyləyib.

Bu xəbər oxundu
- - -