Xalq Cəbhəsi Qəzeti logo
Xalqın səsi
ilham

“Yol hərəkəti haqqında” qanuna əlavə və dəyişiklik olacaq

25.05.18, 10:33
Facebook-da paylaş Twitter-da paylaş Google-da paylaş Yahoo
Bu xəbəri paylaş
 

Milli Məclisin Hüquq siyasəti və dövlət quruculuğu komitəsinin bu gün keçirilən iclasında “Yol hərəkəti haqqında” qanuna əlavə və dəyişiklik müzakirə edilib.
Komitə sədri Əli Hüseynlinin rəhbərliyi ilə keçən iclasda layihə barədə məlumat verilib. Azərbaycan prezidentinin təklifi ilə hazırlanan layihədə qanunun 1-ci maddəsinə 25-1, 25-2 və 25-3 bəndlərin əlavə olunması təklif edilir.
25-1 bəndində bildirilir: Trisikl – işçi həcmi 50 kub santimetrdən çox olan daxiliyanma mühərriki ilə hərəkətə gətirilən və ya mühərrikin tipindən asılı olmayaraq, maksimal konstruksiya sürəti saatda 50 kilometrdən yüksək olan və orta uzununa müstəviyə nəzərən simmetrik yerləşən üçtəkərli mexaniki nəqliyyat vasitəsidir. 25-2 bəndində isə bildirilir ki, yüngül kvadrosikl – yüksüz vəziyyətdə kütləsi 350 kiloqramdan (elektrik mühərriki nəqliyyat vasitələri üçün akkumulyatorların kütləsi nəzərə alınmır) çox olmayan dördtəkərli aşağıdakı mexaniki nəqliyyat vasitəsidir:
- işçi həcmi 50 kubsantimetrdən çox olmayan məcburi alışdırmalı daxili yanma mühərriki ilə təchiz edilən nəqliyyat vasitələri;
- maksimal effektiv gücü 4 kVt-dan çox olmayan digər növ daxili yanma mühərriki ilə təchiz edilən nəqliyyat vasitələri;
- uzun müddətli yüklənmə rejimində mühərrikin nominal maksimal gücü 4 kVt-dan çox olmayan elektrik mühərriki ilə təchiz edilən nəqliyyat vasitələri.
25-3 bəndində isə bildirilir ki, kvadrosikl – yüksüz vəziyyətdə kütləsi 400 kiloqramdan (yük daşımaq üçün nəzərdə tutulan nəqliyyat vasitələri üçün 550 kiloqramdan) çox olmayan (elektrik mühərrikli nəqliyyat vasitələri üçün akkumulyatorların kütləsi nəzərə alınmır) və maksimal effektiv gücü 15 kVt-dan çox olmayan mühərriki dördtəkərli mexaniki nəqliyyat vasitələridir.
Qanunun 34-cü (Sürücülük vəsiqəsi) maddəsinə edilən əlavəyə görə, yuxarıda qeyd edilən nəqliyyat vasitələri üçün sürücülük vəsiqəsi tələb olunur. Qeyd edilən nəqliyyat vasitələrini idarə etmək üçün sürücülük hüququ “B1” altkateqoriyasına şamil edilir.
Layihə Milli Məclisin plenar iclasına tövsiyə olunub.

Bu xəbər oxundu
- - -