Xalq Cəbhəsi Qəzeti logo
Xalqın səsi
ilham

“Qızıl Kəlmə” Ədəbi Mükafatına əsərlərin qəbulu elan edilib

01.08.18, 13:20
Facebook-da paylaş Twitter-da paylaş Google-da paylaş Yahoo
Bu xəbəri paylaş
 

Mədəniyyət Nazirliyi 2018-2019-cu illər üzrə yüksək bədii və sənətkarlıq keyfiyyətlərinə malik ədəbi əsərləri dəyərləndirmək, təbliğ etmək, istedadlı ədiblərin səmərəli yaradıcılıq axtarışlarına zəmin yaratmaq məqsədilə “Qızıl Kəlmə” Ədəbi Mükafatına əsərlərin qəbulunu elan edib.
Nazirlikdən bildirilib ki, mükafata aşağıda göstərilən ədəbi janrlarda yaradılmış, son 2 ildə kitab və ya jurnalda çap edilmiş əsərlər təqdim olunur:
– nəsr əsərləri (roman, povest, hekayə və hekayələr silsiləsi);
– poeziya əsərləri (poema, şeirlər və mahnı mətnləri);
– tənqid, ədəbiyyatşünaslıq və publisistika əsərləri;
– orijinaldan bədii tərcümə əsərləri;
– uşaqlar üçün yazılmış bədii əsərlər.
Mükafata təqdim edilən namizədlər üçün yaş məhdudiyyəti yoxdur. İki ildən bir may ayının ilk ongünlüyündə verilən mükafat rəmzi simvol (döş nişanı), diplom və pul mükafatından ibarətdir.
Namizədlərin irəli sürülməsinə dair elan mətbuatda dərc edildikdən sonra yaradıcılıq təşkilatları, nəşriyyat, redaksiyalar və əvvəllər mükafata layiq görülmüş şəxslər namizəd irəli sürə bilərlər.
Bir təşkilat, şəxs mükafata hər nominasiya üzrə yalnız bir namizəd təqdim edə bilər. Təqdimat aşağıdakı sənədlərdən ibarətdir: Əsəri təqdim edən təşkilatın, şəxsin Mükafat Komissiyasına ünvanlanmış məktubu; Çap edilən əsər (5 nüsxə); Namizədin tərcümeyi-halı və 1 ədəd fotoşəkli; Şəxsiyyət vəsiqəsinin surəti; Müəllifin digər işlərinin siyahısı (əgər varsa); Əsər barədə rəylər və nəşr edilən yazılar (əgər varsa).
İşlər 2018-ci il avqustun 1-dən – 2019-cu il martın 29-u son təqdimat günü olmaqla aşağıdakı ünvana təqdim edilməlidir: AZ 1000, Bakı şəh., Ü.Hacıbəyli küç. 84, Hökumət Evi, 3-cü mərtəbə, 308-ci otaq. Tel: 012 493 23 77

Bu xəbər oxundu
- - -