Ədliyyə Nazirliyi tərəfindən İcra Məcəlləsi hazırlanıb Hadisə

Ədliyyə Nazirliyi tərəfindən İcra Məcəlləsi hazırlanıb

"Ötən il icraatda 910 mindən artıq icra sənədi oxunub. 2019-cu illə müqayisədə bu, 49 min iş daha artıqdır. İşlərin təxminən 89-90%-i məhkəmələr tərəfindən qəbul edilən icra sənədləri idi”.

APA-nın məlumatına görə, bunu Ədliyyə Nazirliyinin 2020-ci il fəaliyyətinə həsr olunan mətbuat konfransında Nazirliyin İcra baş idarəsinin rəis müavini Fərid Əfəndiyev bildirib.

Onun sözlərinə görə, pandemiya ilə bağlı məhdudiyyətlər istər-istəməz müxtəlif sahələrə təsir edib: “Məsələn, uşaqla ünsiyyətlə, yaxud mənzildən çıxarma və digər işlərlə bağlı icra məmurları tərəflərlə ünsiyyətdə olmalıdır. Bir məkanda 5 və ya 10 nəfərin bir yerə yığışması qadağan idi, SMS icazə tətbiq edilirdi, xüsusilə iri şəhərlərdə bir yaşayış məntəqəsindən digərinə getməklə bağlı məhdudiyyətlər var idi, Bu da istər-istəməz icraya mənfi təsirini göstərirdi, amma müəyyən çıxış yolu axtardıq. Bəzi işlər, məsələn, uşaqla ünsiyyət vəziyyətə uyğun video-formata keçirildi. Ödəniş imkanlarının genişləndirilməsi üçün xeyli işlər görüldü, elektron icra platformasında “ASAN ödəniş” imkanı oldu. 2019-cu illə müqayisədə daxil olan müraciətlərin sayı 24% azalıb”.
O qeyd edib ki, daim diqqət mərkəzində olan məsələlərdən biri də özəl icra institutunun yaradılması, alternativ icra mexanizmlərinin tətbiqidir: “Bununla bağlı Ədliyyə naziri Fikrət Məmmədovun sərəncamı ilə bir neçə idarəni birləşdirən İşçi Qrupu yaradılıb. İşçi Qrupuna tapşırıq verildi ki, qısa müddət ərzində özəl icra haqqında qanun layihəsi işlənib hazırlansın. Artıq bu layihə hazırlanıb, hələ ki, razılaşma mərhələsindən keçəcək və daha da təkmil olacaq. Eyni zamanda, vahid normativ hüquqi aktın hazırlanması üzrə iş davam edir. Burada söhbət İcra Məcəlləsindən gedir. Bir neçə dövlət təşkilatından, qurumundan olan təkliflər də nəzərə alınıb. İdarənin strukturunda da xeyli dəyişiklik həyata keçirilib. İcra Baş idarəsində görülən işlərin davamı olaraq Kredit borcları şöbəsi yaradılıb. Həmin şöbə və 2019-cu ilin sonunda yaradılan Analitik nəzarət şöbəsi ilə komplektləşdirmə işləri görüldü. Kredit borcları ilə bağlı sənədlər işin böyük əksəriyyətini təşkil etdiyi üçün bu, yerində atılan addım idi. Yeni yaradılan Qarabağ regional idarəsində yerli icra qurumları da təsis edilib. Mövcud qurumlarda da əlavə ştatla bağlı təkliflər verilib. Bu qurumların komplektləşdirilməsinə də başlanılıb, ora əməkdaşlar təyin edilir. Elektron icra sistemində həmin qurumlarla əlaqədar müvafiq funksionallıqlar yaradılır”.