İqlim dəyişikliyi insan sağlamlığına çox təsir edir. Onun az resurslara malik ölkələrə təsiri daha yüksəkdir. Mövcud biliklər müəyyən tədbirlər görülməsi və siyasət həyata keçirilməsi üçün kifayətdir.

İqlim dəyişikliyinin səhiyyə sahəsinə təsiri ilə bağlı kifayət qədər çağırışlar var. Bu sahədə tədqiqatlar aparılması önəmlidir. Tədqiqatlar ABŞ, Avropa və Cənubi Asiyada daha çox aparılır. Həmin tədqiqatlar Qafqaz və Mərkəzi Asiyada çox deyil. Fikrimə nümunə olaraq bildirim ki, biz kəskin hava şəraiti, onun nəticələri ilə bağlı yetərli məlumat ala bilmirik. Odur ki, əməkdaşlıq və səylərin birləşdirilməsi vacibdir.

AZƏRTAC xəbər verir ki, bunu Akademiyalararası Tərəfdaşlığın nümayəndəsi Robin Fears Bakı İqlim Fəaliyyəti Həftəsi çərçivəsində keçirilən “Elmi çağırışların aradan qaldırılmasında qlobal və regional əməkdaşlığın rolu” panelində çıxışı zamanı deyib.

R.Fears bildirib ki, ciddi boşluqların biri də həllərin kifayət qədər başa düşülməməsidir. Həmçinin tədqiqatların nəticələri necə istifadə olunmalıdır ki, bununla bağlı siyasətlər ortaya qoyulsun. “Tədqiqatların daha tutarlı, daha təsirli olmasını seçməliyik. Sistem əsaslı düşünmə olmalıdır. Tədqiqatçılar iqlim dəyişikliyinin təsirlərindən əziyyət çəkən əhali qrupu ilə birgə işləməli və araşdırmaları onların tələblərinə uyğun qurmalıdırlar. Bu, tədqiqatların daha düzgün və səmərəli olmasına kömək edəcək.

Biz regional və beynəlxalq səviyyədə əməkdaşlıq etməliyik. Təkcə elm adamları, mütəxəssislərlə deyil, vətəndaş cəmiyyəti ilə də birgə işləməliyik. Tədqiqatçılar faydalı nəticələrin əldə olunmasına çalışmalıdır.

Səhiyyə sahəsi iqlim dəyişikliyi müzakirələrində getdikcə daha vacib yer tutur. Son 10 ildə tədqiqatların sayı artıb. Siyasətçilər faktlarla təmin olunmalıdırlar ki, həmin məsələlərin siyasi əhəmiyyətini anlasınlar. İqlim dəyişikliyinin insan sağlamlığına təsirini COVID-19 pandemiyası zamanı gördük. İqlim dəyişikliyi və pandemiyanın bir-biri ilə necə əlaqəli olduğunu müşahidə etdik”, - deyə R.Fears qeyd edib.