Qubadlı rayonunun işğaldan azad olunmasının dördüncü ildönümü ilə əlaqədar rayon ərazisinə media-tur təşkil olunub.

APA xəbər verir ki, Qartız yüksəkliyinə təşkil edilən səfərdə Qubadlı rayonu və burada yerləşən yüksəkliklərin işğaldan azad olunmasının Azərbaycan Ordusuna qazandırdığı üstünlüklər barədə məlumat verilib.

Rayon uğrunda gedən döyüşlərdə şəhid olanların xarirəsi yad edilib. Bildirilib ki, Qubadlı rayonunun yüksəkliklərdən ibarət olması burada gedən döyüşlərin daha şiddətli keçməsinə səbəb olub. Bundan başqa, rayon ərazisində yerləşən Qartız dağının müharibə zamanı strateji əhəmiyyətə malik olduğu vurğulanıb. Qeyd olunub ki, buranın işğaldan azad olunması ətraf kəndlərin də Azərbaycan Ordusunun nəzarətinə keçməsinə şərait yaradıb.

Döyüşlərdə iştirak edən Komando üzvü deyib ki, oktyabrın 13-14-də Qubadlının 4 kəndi, ayın 23-də digər ətraf ərazilər və 25-də isə Qubadlı şəhəri işğaldan azad edilib: “Bu, bizim üçün çox qürurverici hiss idi. Qubadlının azad edilməsi bizim üçün digər rayonlarımızı da əlçatan etdi. Qubadlının azad olunması Laçına irəliləmək baxımından çox əlverişli idi”.

Qeyd olunub ki, Vətən müharibəsində döyüşlərin qızğın getdiyi ərazilərdən biri də Qubadlı rayonu olub: “Bildiyiniz kimi Qubadlı dağlıq olduğundan burada 1000-2000 metrlik yüksəkliklər mövcuddur. Məqsədimiz o zirvələri ələ keçirib düşməni tərksilah etmək idi. Düşmənin çox sayda texnika və canlı qüvvəsini məhv edib, çoxlu sayda qənimət ələ keçirdik”.

Komando döyüşçüsü deyib ki, düşmən strateji yüksəkliklərdə möhkəmlənərək güclü müqavimət göstərib: ”Buna baxmayaraq, Müzəffər Ali Baş Komandanın verdiyi əks-hücum əmri nəticəsində ordumuz Qubadlı və ətraf əraziləri azad etdi və düşməndən tamamilə təmizlədi”.

Media-turda iştirak edən hərbi ekspert Azər Bayramov vurğulayıb ki, hərbi-strateji baxımdan Araz çayı sahili ilə hərəkət edib, İranla sərhədi tam nəzarətə götürmək baxımından Azərbaycan Ordusunun qarşısında Qubadlının azad edilməsi tələbi qoyulub: “Azərbaycan Ordusu Qartız dağı və bir sıra digər adsız yüksəkliklərin alınması ilə Qubadlı şəhəri və bir sıra yüksəklikləri ələ keçirdi. Qubadlıda düşmən xeyli sayda texnika və qüvvə cəmləşdirmişdi. Buna baxmayaraq, Azərbaycan Ordusunun döyüş ruhu və cəsarəti qarşısında tab gətirə bilmədi”.

Bildirilıb ki, Qubadlının azad olunması ilə həm də Qafan-Gorus-Xankəndi yolu ordumuzun nəzarətinə keçib.

Ekspertin sözlərinə görə, Qubadlının azad olunması separatçıların Laçın vasitəsilə təchizatına da maneə yaradıb: ”Bundan sonra Şuşanın azad olunması mümkün oldu”.

Qeyd edək ki, Azərbaycan Ordusu Qubadlı şəhərini Vətən müharibəsinin 29-cu günündə, oktyabrın 25-də işğaldan azad edib.