“Rəhbərlik etdiyim Orta Asiya və Güney Qafqaz Söz Azadlığı Şəbəkəsi” İctimai Birliyinin (CASCFEN) də daxil olduğu Milli qeyri-hökumət təşkilatları forumunun pavilyonu bu günlər ərzində müxtəlif beynəlxalq tədbirlərə ev sahibliyi edir. Bu pavilyon demək olar ki, 1 dəqiqə də boş qalmır. Bura bir-birini əvəz edən və eyni zamanda qlobal əhəmiyyət kəsb edən tədbirlər üçün bir məkana çevrilib. Həmçinin digər sahələrin təmsilçiləri, xarici jurnalistlər də mütəmadi olaraq bu pavilyona baş çəkirlər”. Bu sözləri xalqcebhesi.az-a açıqlamasında Orta Asiya və Güney Qafqaz Söz Azadlığı Şəbəkəsi” İctimai Birliyinin (CASCFEN) sədri, Əməkdar jurnalist Nadir Azəri söyləyib.

Əməkdar jurnalist diqqətə çatdırıb ki, Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin timsalında və onun rəhbərliyində Azərbaycan QHT-ləri bu dəfə də sınaqdan üzü ağ çıxaraq uğurlu fəaliyyət ortaya qoydular: “Əminəm ki, bu 6 gün ərzində olduğu kimi bundan sonrakı günlərdə də biz QHT-lərin bir-birindən maraqlı və mühüm əhəmiyyət kəsb edən tədbirlərinin şahidi olacağıq. Eyni zamanda, Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin hələ tədbir öncəsi Ekologiya və Təbii Sərvətlər Nazirliyi (ETSN) ilə birgə elan etdiyi Qrant müsabiqəsinin qalibi olan QHT-lərin də bu gün COP29 çərçivəsində bu tədbirləri yüksək səviyyədə təşkil etməsi də bir daha onu deməyə əsas verir ki, Azərbaycanın QHT sektoru yeni dövrə qədəm qoyub. Bu dövrdə nəinki yerli, həmçinin beynəlxalq çağırışlara cavab vermək üçün bu sektor inamla addımlayır”.

Röya İsrafiova