Dekabrın 25-də Qazaxıstanın Aktau şəhərində qəzaya uğrayan Braziliya istehsalı olan “Azərbaycan Hava Yolları”ına məxsus “Embraer 190" təyyarəsinin “qara qutu”larının təhlili başlayıb.

APA xəbər verir ki, bu barədə Brazilya mediası məlumat yayıb.

“Qutu”ların təhlilini Braziliya Aviasiya Qəzalarının Araşdırılması və Qarşısının Alınması Mərkəzinin (CENIPA) mütəxəssisləri aparır.

Bildirilib ki, “qara qutu”lar mühüm məlumatlar və səs yazıları ehtiva edir ki, bunlar hadisənin səbəbini müəyyən etmək üçün vacibdir.

Qeyd edək ki, dekabrın 25-də “Azərbaycan Hava Yolları” aviaşirkətinə məxsus J2-8243 nömrəli Bakı-Qroznı reysini yerinə yetirən “Embraer 190” təyyarəsi təcili eniş zərurəti ilə bağlı Aktau şəhəri istiqamətinə yön alaraq, Aktau şəhəri yaxınlığında qəzaya uğrayıb. Təyyarədə 5 ekipaj üzvü və 62 sərnişin olmaqla, ümumilikdə 67 nəfər olub. Qəza nəticəsində 38 nəfər həyatını itirib, 29 nəfər sağ qalıb.

Sağ qalanların 14-ü Azərbaycan, 10-u Rusiya, 2-i Qırğızıstan vətəndaşıdır.