“Son illər türk dünyasının inteqrasiyasının daha da dərinləşməsi istiqamətində uğurlu və sevindirici addımlar atılır, düşünülmüş siyasət həyata keçirilir. Heç, şübhəsiz, dövlət rəhbərlərinin qətiyyətinə əsaslanan bu siyasətin yerlərdə sadə vətəndaşlara daha geniş çatdırılması üçün ictimaiyyət nümayəndələrinin, o cümlədən qeyri-hökumət təşkilatlarının və bu tipli ayrı-ayrı qurumların da üzərinə mühüm vəzifələr düşür”.

Bu sözləri xalqcəbhəsi.az-a açıqlamasında Orta Asiya və Güney Qafqaz Söz Azadlığı Şəbəkəsi” İctimai Birliyinin (CASCFEN) sədri, Əməkdar jurnalist Nadir Azəri deyib.

O qeyd edib ki, Azərbaycan Qiymətləndiricilər Cəmiyyətində (AQC) Cəmiyyət sədri, Türk Dövlətləri Qiymətləndicilər Birlikləri Şurasının (CAATS) Prezidenti Vüqar Orucla olan görüşdə də bu məqamlardan bəhs edilib: “Görüşdə Vüqar Oruc rəhbərlik etdiyi AQC və Türk Dövlətləri Qiymətləndicilər Birlikləri Şurası haqqında ətraflı məlumat verərək türk dövlətləri arasında inteqrasiyanın daha da dərinləşməsi üçün iqtisadi sektorda atılmalı addımlar barədə fikirlərini də bölüşdü. V.Oruc dedi ki, türk dövlətlərinin rəhbərlərinin, xüsusilə də Azərbaycan və Türkiyə prezidentlərinin qətiyyətli addımları, reallaşdırdıqları siyasət bizi qürurlandırmaqla yanaşı, gələcək addımlarımız üçün bir çağırış xarakteri daşıyır”.

Görüş zamanı N.Azəri də rəhbərlik etdiyi təşkilat barədə məlumat verib: “Mən çıxışımda hədəfimizin türk dünyasının QHT sektoru arasında əməkdaşlığın daha da dərinləşməsi olduğu haqqında danışdım. Düşünürəm ki, AQC və Türk Dövlətləri Qiymətləndicilər Birlikləri Şurası ilə bu kontekstdə əməkdaşlıq arzuolunan və vacibdir. Görüşdə CASCFEN-in sədr müavini Fikrət Əliyev CASCFEN-lə AQC və Türk Dövlətləri Qiymətləndicilər Birlikləri Şurası arasında əməkdaşlıq əlaqələrinin qurulmasını və gələcəkdə əməkdaşlıq protokolunun imzalanması təklifini irəli sürdü. Düşünürük ki, bu əməkdaşlıq tərəflərin istər Azərbaycan, istərsə də türk dünyası kontekstində birgə fəaliyyətinin yol xəritəsi ola bilər”.

Röya İsrafilova