Azərbaycan Texniki Universitetinin professoru, texnika elmləri doktoru Misirxan Talıbovun “Müasir termodinamika” adlı yeni kitabı işıq üzü görüb.
Xalqcəbhəsi.az xəbər verir ki, kitab Azərbaycan Texniki Universitetinin Elmi-Metodiki Şurasının 28 noyabr 2024-cü il tarixli (5 nömrəli protokol) qərarı əsasında Azərbaycan Respublikasının Elm və Təhsil Nazirliyi “Azərbaycan Texniki Universiteti” Publik Hüquqi Şəxsin 27 dekabr 2024-cü il tarixli F-219 nömrəli əmri ilə dərslik kimi təsdiq edilib.
Dərslik istilik energetikası mühəndisliyi ixtisası üzrə təhsil alan tələbələr üçün hazırlanıb. Onların istilik texnikasının nəzəri əsasları sahəsində aldıqları biliyi daha da möhkəmləndirmək və bu ixtisasın praktiki tərəfini dərindən mənimsəmək üçün bu kitab tələbələrə yardımçı ola bilər. Kitabda birinci növbədə işçi cisimlərin, daha doğrusu işçi agentlərin (su və su buxarı, freonlar, yanacaqlar və məhlullar) termodinamik xassələrinə baxılır, onların diaqramları, axın termodinamikası öyrənilir, əsas istilik mühərriki sayılan daxili yanma mühərrikinin, qaz-turbin qurğularının termodinamikasına baxılır, onların iş prinsipi, tsikllərinin növləri, faydalı iş əmsalları verilir. Sonra kompressorun və soyuducu maşının işi, tsikli və səmərəliliyi göstərilir, eləcə də dərin soyutma tsiklləri öyrənilir. Daha sonra buxar-guc, istilik energetik qurğuları, atom elektrik stansiyaları və istilik nasoslarının prinsipial sxemləri və tsiklləri aydınlaşdırılır, istilik hesabatı verilir, onlarda gedən termodinamik proseslər öyrənilir.
Bu dərslikdən həm istilik energetikası mühəndisliyi, həm də energetika mühəndisliyi ixtisasları üzrə təhsil alan bakalavrlar, magistrlər, həmçinin doktorantlar səmərəli istifadə edə bilərlər.