Rayonda ictimai nəqliyyatın yoxluğu Lerik camaatı ağır problemlər qarşısında qoyur. İndiki respublikanın dinamik inkişaf etdiyi bir vaxtda bu dağlar diyarında insanların bir yerə getməsi müşkül məsələdir. Uzun illərdir rayon mərkəzindən kəndlərə marşrut avtobusları işləmir. Bəri başdan deyim ki, respublikanın heç yerdə belə bir vəziyyət yoxdur. 1990-cı illərin əvvəllərindən rayonda fəaliyyət göstərən bütün marşrutlar bağlanıb. Elə o gündən ara sürücüləri dövlətin ətək-ətək pul töküb çəkdiyi rahat yollarda camaatın başına olmazın oyunlar açırlar. Əsası budur ki, məcburiyyət qarşısında qalıb yola çıxandan bir manat əvəzinə 15 manat pul alırlar. Özbaşına yolları zəbt edən bu nadan adamlara rayonda “gözün üstə qaşın var” deyən tapılmır.
Bradi rayonun ucqar dağ kəndidir. Yeni çəkilmiş Piran-Hamarat yolu bu kənddən keçir. Asfalt yolda maşınların rahat hərəkəti üçün hər cür şərait yaradılıb. Amma bunun kənd sakinlərə zərrə qədər xeyri yoxdur. Gəlin bunun səbəbini camaatın öz dilindən eşidək.
Şahan Bəşirov (Bradi kənd sakini):- İndi 30 ildən çoxdur ki, kəndimizdən keçib Hamarata gedən avtobus marşrutu heç bir səbəb olmadan ləğv olunub. Bir yerə getməkdən ötrü ara sürücülərə müraciət edirik. Onlarda elə bir qiymət deyirlər ki, adamın onu verməyə gücü çatmır. Mən özüm yaşlı adamam. Kəndimizdən təqribən 12 kilometr aralı bankomat vardır. Marşrutun yoxluğu üzündən oraya düşüb pensiya pulumu çıxarda bilmirəm. Nəzarətsiz taksi fəaliyyəti göstərənlər də həmin yolu gedib-gəlməkdən ötrü məndən 30 manat pul istəyirlər. Şəhərə düşüb ərzaq ala bilmirik. Ayrı-ayrı işbazlar tərəfindən gətirilənlər isə od qiymətinə satılır. Avtobus xətlərin bərpası olduqca vacibdir.
Güloğlan Babayev (Bradi kənd sakini):- Yolumuz rahat olsa da, kəndimizə avtobus işləmir. Odur ki, rayon mərkəzinə, eləcə də ətraf yerlərə getmək imkanından məhrumuq. Ümumiyyətlə, Lerikin bütün kəndləri bu gündədir. Sovet dağılanı kəndlərə işləyən ictimai nəqliyyat da unudulub. Vəziyyət ən qədər acınacaqlı olsa da, qaldı ki, bu, rayon rəhbərlərin heç vecinə deyil. Əhalinin öz dövlətindən istəyi yalnız marşrut avtobusların yenidən xətlərə buraxmasıdır.

Zəfər ORUCOĞLU,
Azərbaycan Jurnalistlər Birliyinin üzvü