“Mən Moskvada Konstantin Raykinin rektor olduğu “Teatr sənətləri” Ali məktəbində dram teatrının rejissoru üzrə birillik tezləşdirilmiş təhsil alıram. Artıq birinci semestri bitirib gəlmişəm və ikinci semestrə, diplom müdafiəsinə hazırlaşıram”.

Bunu xalqcəbhəsi.az-a açıqlamasında quruluşçu rejissor, Əməkdar artist Nicat Mir Kazımov deyib.

Əməkdar artist qeyd edib ki, birinci semestr ərzində sözügedən məktəbdə öyrəndiklərini burada Azərbaycan Dövlət Milli Gənc Tamaşaçılar Teatrının aktyorları, bədii, yaradıcı heyəti ilə paylaşacaq: “Bununla bağlı kiçik bir master-klas keçirmək qərarına gəldik. Öyrəndiklərimi tezis formasında teatrımızın bədii, yaradıcı heyətinə çatdırmağa çalışacam və fikrim də var ki, orada bizə keçirilən treninqləri də onlarla keçim. Çünki öz qazanında qaynamaqla bir şey çıxmır, dünyaya da baxmaq lazımdır. Müasir teatrın dərin kökləri Rusiyadadır və Konstantin Raykinin də bu məktəbi həqiqətən Rusiyada ən seçilən, öndə gedən məktəblərdən biridir. Mən Moskvada onlarla tamaşalara baxdım. O tamaşalara baxmaq və orada təhsil almaq ilk növbədə özünə güvən verir, düzgün yolda və düzgün işlə məşğul olduğunu düşünürsən. Çalışacam ki, master-klasda bu özgüvəni teatrımızın yaradıcı heyətinə təlqin edə bilim”.

Qeyd edək ki, N.Kazımovun ustad dərsləri 26 noyabr saat 15:00-da Azərbaycan Dövlət Milli Gənc Tamaşaçılar Teatrında olacaq.

Röya İsrafilova