“Leyla Khazary ArtGallery”də istedadlı rəssam Nərmin Nəcəfin rəsm əsərlərindən ibarət yeni sərgisi açıb.

“Göyrəngli ovqat” adlı sərgidə Bakıya həsr olunmuş "İşıq" seriyası, eləcə də "Kəlağayı", "Nar" seriyası və digər rəsm əsərləri ziyarətçilərə təqdim olunub.

Rəssam əsərlərində göy rəngin arzular, ucalıq və harmoniyanı ifadə etdiyi bildirib. Qeyd edib ki, əsərləri üçün ilham mənbəyi olan göy rəngin çalarları insanların daxili dünyasını zənginliyini əks etdirir.

Tədbirdə çıxış edənlər bildiriblər ki, Nərmin Nəcəf "Röyalar dünyası" adlı rəssamlıq məktəbinin yaradıcısı və rəhbəridir. Peşəkar yaradıcılığa ilk dəfə 2021-ci ildə Türkiyədə keçirilmiş fərdi sərgisi ilə başlamış rəssamın sonrakı fərdi sərgiləri Bakı, Minsk və Moskvada təşkil edilib. Nərmin Nəcəfin, həmçinin Marmaris, Praqa və London kimi şəhərlərdə keçirilən sərgilərdə əsərləri nümayiş etdirilib.

Sonra qonaqlar sərgi ilə tanış olublar.

Rəssamın əsərlərində milli koloritə müasir baxış əks etdirilir və Azərbaycan mədəniyyəti və mədəni irs nümunələri rənglər və obrazlarla çatdırılır.

“Göyrəngli ovqat” sərgisi dekabrın 24-dək davam edəcək.