“İstehlak kreditlərinin ödənişi zamanı banklar ödəniş cədvəlində faiz ödənişlərini əvvələ salırlar. Bu, doğrudur və Mərkəzi Bankın təlimatları, qaydaları ilə tənzimlənir”.
Bu sözləri xalqcəbhəsi.az-a açıqlamasında iqtisadçı ekspert Xalid Kərimli söyləyib.
O əlavə edib ki, yəni vətəndaş borcu ödəyərkən ilk növbədə faiz borcu ödənilir, daha sonra əsas borc: “Tutaq ki, vətəndaş 20 faizdən 10 min manat kredit götürüb. Məsələn, ilə 2 min manat faiz borcudur. Qrafiki tutaq ki, 200 manatdırsa, o zaman öncə 167 borcdan silinəcək, yerdə qalan 33 manat əsas məbləğə gedəcək. Çünki vətəndaş borcunu ödəyəndə əvvəlcə aya görə toplanmış faizi, sonra əsas məbləği ödəyir. Yəni vətəndaşın o 200 manatlıq ödənişi iki hissəyə bölünür: əsas borc və faiz məbləği. Və əvvəlki dönəmlərdə də əsas məbləğ çox olduğuna görə faizi də daha çox olur, tədricən isə azalır. Yəni burada yanlış bir məsələ, qanunsuzluq yoxdur. Bu, annuitet ödəmənin normal qaydasıdır və dünyanın hər yerində də belədir”.
X.Kərimli qeyd edib ki, bərabər hissələrə bölünüb borc alınanda həmin o bərabər hissələrlə faiz axıra saxlanmır: “Həmin o bərabər hissə ödəniləndə yığılmış faiz də ödənilir. Ona görə də vətəndaşın ödədiyi ümumi məbləğ iki hissəyə bölünür. Faiz də ilk dönəmdə çox olduğuna görə çox silinmiş olur. Yəni ödənilən məbləğin çox hissəsi faizə getmiş olur. Ancaq borcu tam bağlayan halda bütün faiz ödənmir, həmin dövrə yığılmış faiz ödənmiş olur. Vətəndaş borcu tez ödəyə bilər, hətta belə bir hal da ola bilər, yəni müqavilədə göstərilə bilər ki, borcu tez ödəyəndə cərimə faizi də işlənə bilər. Bu da qanunidir. Müqavilə bağlayarkən onu da nəzərə almaq lazımdır ki, borcu tez bağlamaq istəyəndə cərimə faizi olmasın”.

Röya İsrafilova