“Son illər türk dövlətləri arasında əməkdaşlıq, inteqrasiya daha da dərinləşir və inkişaf edir. Bu da Türk dünyasının vahid güc mərkəzi kimi qlobal məkanda öz sözünü daha inamla deməsi üçün mühüm rol oynayır. Çəkinmədən qeyd edə bilərik ki, Azərbaycanın 44 günlük Vətən savaşında əldə etdiyi tarixi zəfər, Türk dünyasının inteqrasiyasını daha da sürətləndirdi, Türk Dövlətləri Təşkilatının (TDT) timsalında Türk dünyasının qlobal məkanda daha inamlı addımlar atmasına stimul rolunu oynadı”.

Bunu xalqcəbhəsi.az-a açıqlamasında Orta Asiya və Güney Qafqaz Söz Azadlığı Şəbəkəsi (CASCFEN) İctimai Birliyinin sədri, Əməkdar jurnalist Nadir Azəri deyib.

N.Azəri qeyd edib ki, hazırda TDT çərçivəsində bu təşkilatda təmsil olunan ölkələr arasında müxtəlif sahələri əhatə edən proqramlar reallaşdırılır, sazişlər imzalanır, müxtəlif birliklər, vahid mərkəzlər yaranır: “Eyni zamanda, hesab edirəm ki, Türk dünyasının ortaq dəyərlərinin gələcək nəsillərə daha dolğun çatdırılması ilə bağlı atılması vacib olan digər addımlar da var. Həmçinin uzun illər Türk dünyasından qoparılmağ və Türk dünyasını istəməyən qüvvələr tərəfindən siyasiləşdirilməyə çalışılan dəyərlərimiz, simvollarımız var. Onlara da yenidən həyat verilməli və onlar da Türk dünyasının ortaq dəyəri kimi öz layiqli yerini tutmalıdır. Bu baxımdan hesab edirəm ki, TDT-nin vahid, ümumi “Bozqurd” şərəf nişanı və ya şərəf ordeni təsis edilsə çox yaxşı olar”.

Əməkdar jurnalist vurğulayıb ki, bunu təsis etməklə Bozqurdun hər hansısa bir siyasi kəsimin deyil, ümumilikdə Türk dünyasının dəyəri olduğunu təsdiqləmiş olarıq: “Mən arzu edirəm ki, TDT-nin dövlət rəhbərlərinin növbəti sammitlərin birində bununla bağlı bir qərarı qəbul olunsun və uzun illər həm düşmənlərimizin, həm də Türk dünyasındakı bəzi yanlış təbliğat aparanların səbəbindən bizdən uzaq salınan Bozqurd öz milli, tarixi, türk kimliyinə qaytarılsın. Bozqurd hər hansı bir siyasi təşkilatın deyil, Türk dünyasının vahid simgəsi olması statusunu qazansın”.

Röya İsrafilova