“Suriyada baş verən hadisələr qəfil olmadı. Uzun müddət buna hazırlıq görülürdü. Məlum məsələ idi ki, həm Türkiyənin, eyni zamanda, ABŞ-nin, Rusiyanın, İsrailin, İranın Suriyada daim özəl maraqları vardı və bu maraqları həyata keçirmək üçün danışıqlar mövcud idi”.
Bunu xalqcəbhəsi.az-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev deyib.
Onun fikrincə, burada əsas məqam ondan ibarətdir ki, Türkiyə burada çox mühüm bir rol oynadı: “Gələcəkdə Türkiyənin sərhədd bölgəsində, stabillik yaratmaq, eyni zamanda, Türkiyə ərazisində olan Əsəd rejimindən qaçan Suriya qaçqınlarını geri qaytarmaq çox mühüm bir amildir. Bu, həm iqtisadi, həm siyasi, həm hərbi baxımdan dövlətlərə təsir edən amildir. ABŞ-nin Dövlət katibi Blinken və Türkiyənin xarici işlər naziri Hakan Fidan arasında olan danışıqlardan da bir daha məlum olur ki, terror təşkilatlarının kimin tərəfində olub-olmaması məsələsini gündəmə gətiriləcək. Lakin düşünmürəm ki, ABŞ orada insan hüquqları adı altnda terrorçulara dəstəyini davam etdirsin. Təbii ki, onların orada maraqları var və daimi bunu təmin etməyə çalışıblar. Rusiyanın da maraqları təmin olnub. Hazırda Əsəd rejiminin baş nazirinin hökumətin ötürülməsi prosesində iştirakı, eyni zamanda, Suriya ərazisində yerləşən Rusiya hərbi bazaların mövcudluğunun davamlı olması və hücumlardan sığortalanması məsələsi var. Rusiya da bu proseslərdə məhz Bəşər Əsədə siyasi sığınacaq verməklə öz maraqlarını təmin edir”.
A.Nağıyev həmçinin qeyd edib ki, İsrailin artıq Qolan yüksəkliklərinə hücumu başlayıb: “Yarım əsr demək olar ki, orada həmin yüksəkliklər həm İranın, həm Suriyanın nəzarətində olub. İsrail bu bölgəni əldə etməklə paralel olaraq Hizbullahın və digər Suriya ərazisində olan terrorçuların hərbi bazalarının məhv edilməsi prosesini yürüdürü. Yəni birmənalı şəkildə hər bir dövlətin orada öz marağı var. Türkiyənin də mövqeyi birmənalıdır. Çünki Suriya ilə sərhədi, çoxsaylı qaçqını var və ərazidə separatizmi dəstəkləyən terrorçular mövcuddur. Yəni bunların hamısı məlum məsələdir ki, Türkiyənin mövqeyinə təsir edən əsas amillərdir. Düşünürəm ki, burada qalib tərəf kimi də Türkiyəni qeyd etmək mümkündür. Türkiyə demək olar ki, həm diplomatik səviyyədə, həm digər istiqamətdə qələbə əldə etmiş dövlətdir”.

Röya İsrafilova