“Prezident İlham Əliyevin müsahibəsində cənab Prezidentin Dmitri Kiselyovun NATO ilə müharibə başlanarsa, Rusiyanın müttəfiqi olaraq Azərbaycanın necə davaranacağı haqqında sualına verdiyi, təkcə Moskvada deyil, onlarla ölkənin paytaxtında diqqətlə izlənəcək cavab idi. Adətən, belə çətin suallara cavab konkretlikdən uzaq olur. Amma dövlət başçımız yenə fərqli bir davranış ortaya qoydu və bu da onun şəxsi göstəriciləri ilə yanaşı, həm də dövlətimizin indiyədək yeritdiyi balanslı siyasətin özünü tam doğrultmasıyla bağlıdır”.

Bunu xalqcəbhəsi.az-a açıqlamasında Milli Məclisin deputatı Sahib Alıyev söyləyib.

Deputat diqqətə çatdırıb ki, cənab Prezidentin də vurğuladığı kimi indiyədək Bakıda Rusiya Ordusunun Baş Qərargah rəisi ilə NATO Hərbi Komitəsinin və Birləşmiş Ştatların hərbi rəhbərliyi arasında bir neçə dəfə görüş keçirilib: “Çünki həm Qərbdə, həm Rusiyada, həm də Şərqdə etibar edilən ölkələr çox deyil. Ona görə də həm Rusiya, həm də NATO üzvü Türkiyə ilə müttəfiqlik anlaşması imzalayan yeganə ölkə olan Azərbaycan böyük güclər arasında qarşıdurmada kiminsə yanında yer almağı yox, qarşıdurmaya son qoyulacaq yer olmağı planlaşdırır”.

Röya İsrafilova