“Azərbaycan Prezidenti İlham Əliyevin adı Azərbaycan tarixində həmişə zəfərlə bərabər çəkiləcək. Çünki xalqımızın 2 əsr boyu həsrət qaldığı ümummilli bir zəfərə məhz Prezident İlham Əliyev imza atdı və Azərbaycan xalqını qalib xalqa, Azərbaycan Ordusunu qalib orduya çevirməyi bacardı. Amma biz bilirik ki, xalq, ordu, dövlət öz-özünə qalib olmur. Hər şeydən öncə bu qalibiyyəti, zəfəri əldə etmək üçün böyük siyasi uzaqgörənliyə, siyasi müdrikliyə, güclü idarəetmə qabiliyyətinə, milli gücü səfərbər etmək istedadına, milli maraqları qorumaq qətiyyəti və əzminə sahib olmaq lazımdır. Bu keyfiyyətlərin hamısı Azərbaycan Prezidentində var. Azərbaycan Prezidenti əslində qalibiyyətə gedən yolun böyük bir hissəsinin memarıdır. Həm siyasi, həm hərbi, həm diplomatik memarıdır”.

Bu sözləri xalqcəbhəsi.az-a açıqlamasında Milli Məclisin deputatı Hikmət Babaoğlu deyib.

H.Babaoğlu vurğulayıb ki, müstəqil Azərbaycan dövlətinin dövlətçilik əsaslarını böyük dövlət xadimi Ulu öndər Heydər Əliyev yaratdı, amma çox sürətlə dəyişən qlobal şərtlər içərisində millətimiz və dövlətimiz qarşısında qalibiyyəti əldə etmək üçün böyük fədakarlıq, əzmkarlıq və uzaqgörənlik lazım idi: “Buna görə düşünürəm ki, Azərbaycan Prezidenti məhz bunların öhdəsindən gəlməyi bacardı. Hər şeydən öncə Prezident İlham Əliyev iki mühüm strateji qərar qəbul etdi. Bunlardan biri Azərbaycan Respublikasının beynəlxalq münasibətlər sistemində yerinin və rolunun artırılması, güclü institutlara, Avropa institutlarına və qeyri-Avropa institutlarına Azərbaycanın inteqrasiya olunması və dünya siyasətini təyin edən güclər tərəfindən Azərbaycanın qəbul olunması. Məncə Azərbaycanın kommunikasiya və böyük iqtisadi layihələri, bundan başqa ölkəmizin multikultural, hüquqi, demokratik bir ölkə olmasının dünyaya qəbul etdirilməsi bu iki əsas məsələdən biri idi. İkincisi, güclü iqtisadiyyat yaratmaqla, güclü ordu qurmaqla bu orduda xidmət göstərəcək vətəndaşlarımızın milli vətənpərvərlik ruhunda tərbiyə olunması. Göründüyü kimi, bu iki istiqamətdə həm milli-mənəvi, həm də siyasi-iqtisadi komponentlər var. Dolayısı ilə, kompleks tədbirlər nəticəsində biz bu tarixi zəfərə gəlib çatdıq və bunun da həm təşkilatçısı, həm icra edicisi, həm də ideoloji və siyasi memarı Azərbaycan Prezidenti İlham Əliyevdir”.

Röya İsrafilova