“Azərbaycanla əməkdaşlıq beynəlxalq təşkilatların marağındadır, amma bu əməkdaşlıq Azərbaycanın da marağındadır. Çünki ölkəmiz bu təşkilatlardakı fəaliyyətindən istifadə edərək özünün nüfuzunu daha da yüksəldir, müsbət imicini daha da inkişaf etdirir, eyni zamanda ölkəmizə qarşı müxtəlif məsələlərdə siyasi və diplomatik platformalar vasitəsilə hücuma keçən qüvvələrin hücumlarını dəf edir. Məsələn, Azərbaycan II Qarabağ müharibəsindən sonra ərazi bütövlüyünü, suverenliyini təmin etdi. Bu zaman Fransa kimi dövlətlər Azərbaycana qarşı səfərbər oldular”.

Bu sözləri xalqcəbhəsi.az-a açıqlamasında Siyasi və Hüquqi Araşdırmalar Mərkəzinin (SHAM) rəhbəri, politoloq Xəyal Bəşirov söyləyib.

O qeyd edib ki, Azərbaycan Avropa İttifaqının, Avropa Şurası Parlament Assambleyasının, BMT Təhlükəsizlik Şurasının, Frankofoniya təşkilatının bütün bu hücumlarını dəf etmək üçün beynəlxalq aləmdəki nüfuzundan, uğurlu fəaliyyətindən istifadə etdi: “Frankofoniya humanitar təşkilat olmasına baxmayaraq Fransa Azərbaycana qarşı qətnamənin qəbul edilməsinə cəhd göstərdi, amma Azərbaycan Qoşulmama Hərəkatındakı sədrliyindən, oradakı nüfuzundan istifadə edərək Qoşulmama Hərəkatına üzv olan, eyni zamanda Frankofoniya təşkilatında təmsil olunan dövlətlər, dostları vasitəsilə qətnamənin mətnində dəyişiklik etməyə nail oldu. Daha sonra BMT Təhlükəsizlik Şurasında qətnamənin qəbul edilməsinə mane olduq. Bütün bunlar bizim xarici siyasətimizin uğurlarıdır. Düşünürəm ki, bu bir daha göstərir ki, Azərbaycan doğru yoldadır və yürüdülən siyasət Azərbaycan dövlətinin və xalqının maraqlarına xidmət edir”.

Röya İsrafilova