“2024-cü ili Azərbaycan tarixində çox uğurlu il hesab edirəm. Çünki tariximizdə ilk dəfə olaraq həm prezident, həm parlament seçkilərini suverenliyini bərpa etmiş, torpaqlarını qaytarmış bütöv Azərbaycan ərazisində keçirdik. Bu, çox böyük uğur, Azərbaycan tarixində şanlı səhifədir”.

Bunu xalqəbhəsi.az-a açıqlamasında Milli Məclisin deputatı Fariz İsmayılzadə deyib.

Deputat həmçinin bildirib ki, bu il Azərbaycan mötəbər tədbir olan COP29 sammitinə ev sahibliyi etdi: “Bu tədbirə 200-dən çox ölkədən 75 min rəsmi nümayəndənin gəlməsi və 80-nə yaxın dövlət, hökumət başçısının iştirakı Azərbaycan üçün çox böyük diplomatik uğurdur. Demək olar ki, Azərbaycan bir neçə ay ərzində dünya siyasətinin, diplomatiyasının mərkəzinə çevrildi və bu sammit çox uğurlu keçdi, mühüm qərarlar qəbul olundu. İqlim dəyişikliyi ilə bağlı mübarizəyə töhfə verən qərarlar oldu. Faktiki olaraq planetimizin gələcəyini və onun məhv olmasının qarşısının alınmasında Azərbaycan çox böyük rol oynadı”.

F.İsmayılzadə Azərbaycanın uğurları sırasında yeni təşkilatlara, o cümlədən D-8 təşkilatına üzv olmasını, eləcə də bir neçə təşkilatda, beynəlxalq forumlarda sədrliyin Azərbaycana keçməsini diqqətə çatdırıb: “Bundan əlavə Qarabağda quruculuq və bərpa işləri, bütün bunlar göstərir ki, Azərbaycan sürətlə inkişaf edir. Bizim regionda müharibələrin davam etdiyinə, qeyri-sabitlik olmasına baxmayaraq Azərbaycan diplomatik məharətinə görə bu sabitliyi qoruya bilir və iqtisadi inkişafa yönəlmiş siyasət aparır”.

Röya İsrafilova