“Cənab Prezidentimiz İlham Əliyevin yerli televiziya kanallarına müsahibəsi 2024-cü ilə yekun vurmaq və 2025-ci ildə qarşıda dayanan hədəfləri bilmək baxımından çox əhəmiyyətlidir. Mahiyyətinə görə dərin, məzmunca geniş olan bu müsahibədə ölkəmizin daxili və xarici siyasəti ilə bağlı demək olar ki, bütün məsələlər öz əksini tapıb”.

Bu sözləri xalqcəbhəsi.az-a açıqlamasında Milli Məclis sədrinin müavini Musa Qasımlı söyləyib.

M.Qasımlı vurğulayıb ki, hər şeydən əvvəl ötən il ölkəmiz üçün uğurlu olub: “Qeyri-neft sektorunda artım 7 faizdən çoxdur. Ölkəmizin maliyyə ehtiyatları artıb. Xarici borclar aşağı səviyyədədir. İnsanlarımızın həyat şəraiti yaxşılaşıb, minimum əməkhaqqı artıb”.

Vitse-spiker müsahibədə vacib məsələlərdən birinin Azərbaycanın ev sahibliyi etdiyi COP29-un uğurla başa çatması, baykot çağırışçılarının iflasa uğuraması olduğunu deyib: “Tarixində ilk dəfə olaraq COP Azərbaycanda ən yüksək səviyyədə təşkil edildi və indiyə qədər əldə olunmayan bir çox məsələlər həll edildi. Müsahibə zamanı cənab Prezident xüsusi vurğuladı ki, ölkəmiz üçün ən böyük uğurlardan biri D-8 müsəlman ölkələrinin cərgəsinə Azərbaycanın üzv qəbul edilməsidir. Heç şübhəsiz bu, cənab Prezidentimizin rəhbərliyi altında xarici siyasətimizin uğurlarından biridir”.

Röya İsrafilova