“Cənab Prezident İlham Əliyev yerli televiziya kanallarına müsahibəsində Azərbaycan-Ermənistan münasibətlərinə də toxundu. Ermənilər tərəfindən atəşkəsin pozulması və Azərbaycan ərazilərini atəşə məruz qoymaq gələcəkdə sülh müqaviləsinin imzalanmasına mane olmaq, eyni zamanda, status-kvonu saxlamaq deməkdir”.

Bu sözləri xalqcəbhəsi.az-a açıqlamasında Milli Məclisin Müdafiə, təhlükəsizlik və korrupsiyaya qarşı mübarizə komitəsinin sədri Arzu Nağıyev deyib.

Deputat əlavə edib ki, ermənilər hər hansı bir təxribat etdikdə Azərbaycan adekvat cavab verməyə məcburdur: “Bu zaman onlar bunu bütün dünyaya car çəkəcəklər və sərhəddə vizual kəşfiyyatçı adından olan Avropanın bir sıra qurumlarının nümayəndələri bunu istədikləri kimi məruzə edəcəklər. Amma bu, bizi qorxutmur. Əsas məqam odur ki, ilk təxribatı ermənilər törədir, bunun qarşılıqlı cavabını aldıqdan sonra isə öz bildiklərini etməyə çalışırlar. Bu heç də normal məsələ deyil. Çünki bu, bir daha sülhün bərqərar olmasına mane törədə biləcək əsas addımdır”.

Röya İsrafilova