“Cənab Prezident müsahibəsində Zəngəzur dəhlizi ilə bağlı Ermənistanın mövqeyini qeyd etdi və vurğuladı ki, Zəngəzur dəhlizi açılmalıdır. Artıq bu, Ermənistan tərəfinə də bir siqnaldır və düşünürük ki, Ermənistan bu məsələlər barəsində çox diqqətlə düşünməlidir”.

Bunu xalqcəbhəsi.az-a açıqlamasında Milli Məclisin deputatı Vüqar İskəndərov deyib.

Deputat diqqətə çatdırıb ki, digər məsələ Ermənistanın indiki situasiyada sülh müqaviləsinin imzalanması yolundakı göstərdiyi qeyri-adekvat siyasətidir: “Ermənistan hakimiyyəti bu məsələdə də çox qətiyyətli addımlar atmalıdır. Azərbaycan sülh istəyir, lakin Ermənistan sülh istəmirsə, o zaman o sülh bizə də lazım deyil. Biz müstəqilliyimizi bərpa etmişik. Bu gün biz qürurlu xalqıq, sürətlə inkişaf edirik. Cənab Prezident qətiyyətlə vurğuladı ki, Ermənistanın belə qeyri-adekvat münasibətlərinə bizim səbrimizin çox olmadığını onlar yaxşı bilir. Erməni cəmiyyəti bunu artıq çox ciddi siqnal kimi qəbul edir. Cənab Prezidentin bir fikri də hazırda hələ də erməni teleqram kanallarında sürətlə yayılmaqdadır və ermənilər bunun kimin tərəfindən edildiyinin fərqindədirlər. Cənab Prezident qeyd etdi ki, Ermənistanda faşizmin kökü kəsilməli, məhv edilməlidir və bunu Ermənistan özü etməlidir. Ermənistan bunu etməsə, biz edəcəyik. Yəni bu da bugünkü Ermənistan siyasi hakimiyyətinə bir sinqaldır. Radikal, faşist ideologiya daşıyıcıları mütləq məhv edilməlidir. XXI əsrdə bu ideologiyanı daşıyanlara yer olmamalıdır. Bu məsələdə də Prezidentimiz Ermənistana mühüm mesajlar çatdırdı”.

V.İskəndərov Prezidentin müsahibəsindəki bütün məqamların Azərbayacanın dünəni, bu günü və gələcəyi üçün əhəmiyyətli olduğunu vurğulayaraq əlavə edib ki, müsahibədə söylənilən çox vacib məsələlər həm ölkəmizdə, həm qlobal anlamda böyük rezonans doğurub və həmin fikirlər həm də hər birimiz üçün yol xəritəsi kimi qeyd edilməlidir.

Röya İsrafilova