“Minimum əməkhaqlarının artırılması bir neçə aspektdə müsbət haldır. Birincisi, son iki ildə inflyasiya müşahidə olunub. Minimum əməkhaqlarının artırılması ümumi əmək bazarında əməkhaqlarına artırıcı təsir edəcək. Ən aşağı maaşlar artırılacaq və vahid tarif cədvəli ilə əməkhaqqı alan dövlət büdcəsindən maliyyələşən təşkilatlarda işləyən şəxslərin maaşları artacaq. Dövlət büdcədən maliyyələşən işçilərin əməkhaqlarının artırılması ilə bağlı sərəncam verəcək, yəni Prezidentin sərəncamları olacaq. Büdcədə bu istiqamətdə 700 milyondan çox əlavə vəsait nəzərdə tutulub”.
Bunu xalqcəbhəsi.az-a açıqlamasında iqtisadçı ekspert Xalid Kərimli deyib.
X.Kərimli qeyd edib ki, minimum əməkhaqlarının artırılması özəl sektora da təsir edəcək: “Minimum əməkhaqlarının artırılması təkcə dövlət sektoru üçün deyil. Özəl sektorda da minimum əməkhaqqından aşağı maaş alanların əməkhaqları artırılacaq. Pensiyaların artırılmasına gələndə isə hələ statistika dəqiq deyil, fevralın ilk ongünlüyündə nə qədər olacağı bilinəcək. Məsələ odur ki, pensiyalar muzdlu işçilərin əməkhaqqısının orta illik artım faizinə uyğun artırılır. O da fevralın ilk ongünlüyündə bilinir. Həmişə rəqəm bir az gec elan edilir. Ümumiyyətlə, o statistika 1 ay ləngiməklə verilir. Yəni şirkətlərdən toplanınca, hesablanınca bir az zaman alır”.
İqtisadçı bildirib ki, yanvarın 1-dən olan artımlar fevral ayında ödəniləcək: “Təqribən bu rəqəm 7-8 faiz arası olacaq. Bu da pensiyaların artımının avtomatik indeskləşməsidir. Bir də minimum pensiya artırıldı. Bu da o deməkdir ki, pensiya kapitalı formalaşdırmayan, iş təcrübəsi olmayan şəxslərin də minimum pensiyası 280 manatdan 320 manata qaldırıldı. Yəni ölkədə 320 manatdan aşağı pensiya ola bilməz. Bütün bunların təbii ki, müsbət cəhətləri var. Müsbət tərəfi ki, əhalinin sosial rifah halı yaxşılaşır, mənfi tərəfi isə odur ki, inflyasiyaya təzyiq yaradır. Bir də şirkətlərin xərci artır”.

Röya İsrafilova