“ABŞ və Ermənistan arasında yanvarın 14-də imzalanan strateji tərəfdaşlıq haqqında anlaşma iki ölkənin özlərinə aid olan məsələdir. Amma, eyni zamanda, bu anlaşmanın Azərbaycana, o cümlədən Cənubi Qafqazdakı region ölkələrinə təsiri təbii ki, olacaq. Təəssüf ki, bu təsir heç də müsbət yöndə olmayacaq. Artıq son bir neçə ildə Cənubi Qafqazda ABŞ, Qərb Rusiyanı bölgədən sıxışdırıb çıxarmaq istəyir və bu, prosesdə Ermənistandan “Troya atı” kimi istifadə olunur”.

Bu sözləri xalqcəbhəsi.az-a açıqlamasında politoloq Oqtay Qasımov söyləyib.

O.Qasımov əlavə edib ki, bu rəqabət heç də Cənubi Qafqaza sülh və sabitlik gətirmək məqsədilə edilmir: “Sadəcə olaraq geopolitik bir mübarizə gedir. ABŞ guya Azərbaycan və Ermənistan arasında vasitəçilik etməyə iddialı bir tərəf kimi uzun müddət çıxış etməyə cəhd edib. Lakin son 2 ildə ABŞ-nin Ermənistana birtərəfli dəstəyi və proseslərdə qərəzli mövqe tutması onun əslində vasitəçilik kimi bu prosesdən uzaqlaşdırılması ilə nəticələndi”.

Politoloq yanvarın 14-də imzananan sazişin keçən ilin aprelindən başlayan bir prosesin davamı kimi qiymətləndirdiyini vurğulayıb: “Belə ki, 5 apreldə ABŞ, Ermənistan, Avropa İttifaqı üçtərəfli danışıqlarında Ermənistana bütün istiqamətlərdə dəstək verilməsi ilə bağlı razılaşmalar əldə olundu. Heç də təsadüfi deyil ki, bu razılaşmaları bəzən Marşal planı kimi də dəyərləndirənlər var. Və bu, elə məhz bu cürdür. Yanvarın 14-də imzalanan bu sənəddə təhlükəsizlik, müdafiə, sərhəd və gömrük məsələləri, Ermənistana nümayəndələrin göndərilməsi ilə bağlı razılaşmalar və s. bu kimi məsələlər yer alır”.

Onun sözlərinə görə, bütün bunlar onu göstərir ki, yaxın dövrlərdə biz Cənubi Qafqazda Azərbaycan və Ermənistan arasında normallaşma ilə bağlı hansısa ciddi bir irəliləyişin olacağını görməyəcəyik: “Çünki bir daha qeyd edirəm, bu razılaşma ilk növbədə həm də Azərbaycana qarşı yönəlib. Düşünürəm ki, bundan sonra sülh prosesində irəliləmələr yavaşlayacaq, sənədlərin delimitasiya və demarkasiya prosesi ciddi şəkildə irəliləməyəcək və biz Zəngəzur dəhlizinin açılması ilə bağlı hansısa ciddi irəliləyişləri görməyəcəyik. ABŞ-nin hərbi cəhətdən bölgədə olması bir daha qeyd edirəm Cənubi Qafqaz üçün kifayət qədər ciddi risklər yaradacaq”.

Röya İsrafilova