“Görünən odur ki, ikinci Donald Tramp dövrü daha çox iki məqam ilə diqqətdə olacaq”.

Bunu xalqcəbhəsi.az-a açıqlamasında “Orta Asiya və Güney Qafqaz Söz Azadlığı Şəbəkəsi” İctimai Birliyinin sədri, Əməkdar jurnalist Nadir İsmayılov deyib.

N.İsmayılovun sözlərinə görə, birinci məqam ondan ibarətdir ki, ABŞ-Çin mübarizəsi daha da şiddətlənəcək və yeni sahələri əhatə edəcək: “Çünki son dövrlərdə tez-tez “Çində istehsal olunan və Amerikaya idxal edilən elektrik avtomobillərinə Avropaya bənzər oxşar verginin tətbiqi ilə bağlı” fikirlər səslənirdi və D.Tramp çıxışında bu məsələyə demək olar ki, aydınlıq gətirdi. O, ABŞ-də elektrikli avtomobil planına son qoyulacağına işarə etdi. Bu da Çinə qarşı növbəti iqtisadi savaşın işartılarıdır”.

Əməkdar jurnalist qeyd edib ki, Çin-ABŞ gərginliyinin artacağına işarə edən başqa bir məqam isə Trampın Panama kanalı ilə bağlı fikirləri oldu: “Köhnə-yeni prezident Panama kanalının Panamaya verilməsinin düzgün olmadığını deməklə yanaşı, bu kanalın hazırda Çin tərəfindən idarə edildiyini də xüsusi qəzəblə vurğuladı və “Çinin orada nə işi var” deyə sual etdi. Yəni, D.Trampın “Panama kanalı” istəyinin arxasında da məhz ABŞ-Çin mübarizəsinin dayandığını deyə bilərik”.

O hesab edir ki, D.Trampın növbəti dövrdəki hakimiyyəti həm də daxildə ciddi şəkildə “təmizləmələr”lə yadda qalacaq: “Hər halda Trampın “Cümhuriyyətimizi geri almaq həmişə çətin yol olub, heç vaxt asan olmayıb, azadlığımı, hətta həyatımı da əlimdən almağa çalışıblar. Bir neçə ay əvvəl qulağımdan bir qatil gülləsi keçdi. Həyatım bir səbəbdən xilas oldu, Amerikanı yenidən güclü edə bilməm üçün Allah məni xilas etdi” deməsi və prezident kimi ilk saatlarından etibarən çoxsaylı sənədləri ləğv edəcəyini söyləməsi də bunu təsdiqləyir”.

Röya İsrafilova