“USAID-in Azərbaycanla bağlı dedikləri, ümumiyyətlə, USAID-in dünyanın ayrı-ayrı ölkələrində etdikləri hər kəsə çox yaxşı məlumdur. Burada sirr heçnə yoxdur. Məlumdur ki, dünyada bir çox çağırışlar və problemlərin başında elə USAID dayanır. Bir tərəfdən humanitar yardımlar, tibb, təhsil sahəsində hansısa yaxşılıqlar öz aləmində edirdi. Amma bütün bunlar maskalanmaq üçün idi. Sözün həqiqi mənasında ultraqlobalistlər öz məqsədlərini bu və digər xalqlarla, dövlətlərlə bağlı edirdilər. Əlbəttə ki, onların planları hələ də var”.

Bu sözləri xalqcəbhəsi.az-a açıqlamasında politoloq Zaur Məmmədov söyləyib.

Z.Məmmədov bildirib ki, Trampın atdığı addımlar o demək deyil ki, USAID-in sonu gəlib və bu təşkilat artıq ləğv ediləcək: “Təşkilat bu və ya digər formada da fəaliyyət göstərə bilər. Hazırda ABŞ-nin daxilində vətəndaş müharibəsi gedir desək, yəqin ki, yanılmarıq. Sözün həqiqi mənasında bu, orada olan təkcə ABŞ mərkəzləri deyil, ümumiyyətlə, qlobal mərkəzlər arasında ziddiyyətlərin artıq münaqişə mərhələsinə keçməsidir. Burada təkcə ultraqlobalistlərlə bu siyasətə qarşı çıxanlar deyil, eyni zamanda, biz dünyanın maliyyəsinə ağalıq edən şəxslər və mərkəzlər arasında da mübarizəni görürük”.

Politoloqun sözlərinə görə, Azərbaycan Prezidenti də, Azərbaycan hakimiyyəti də dəfələrlə USAID-in hansı məqsədlərlə bu və ya digər ölkələrdə fəaliyyət göstərdiyini qeyd edib: “Bu günlərdə İlon Maskın və Trampın USAID ilə bağlı bəyanatları bir daha onu göstərir ki, bəli, Azərbaycan USAID-i ittiham etmirdi, söhbət həqiqətdən gedirdi. Həqiqət isə ondan ibarət idi ki, milli suverenliyə təhdid, dövlətlərin daxili işlərinə qarışmaq, xaos, qeyri-sabitlik yaratmaq onların əsas məqsədlərindən biri olaraq qalırdı. Dünyada rəngli inqilabların başında da, ayrı-ayrı qlobal çağırışların, eləcə də həm iqtisadi, həm siyasi, həm tibbi çağırışların başında da USAID kimi təşkilatlar dayanırdı”.

Röya İsrafilova