“Rusiya-Ukrayna müharibəsi ilə bağlı iclaslar zamanı qəbul edilən əsas qərarları belə sıralamaq olar. Birincisi, tərəflər Rusiya-Amerika münasibətlərində “narahatedici elementlərin” aradan qaldırılmasına yönəlmiş məsləhətləşmə mexanizminin yaradılması barədə razılığa gəliblər. Ukraynada münaqişənin bütün tərəflər üçün məqbul olan davamlı həllinə nail olmaqla bağlı ilkin mərhələdə işə başlamaq üçün yüksək səviyyəli komandaların təyin edilməsi qərara alınıb. Qarşılıqlı geosiyasi maraqlara, eləcə də Ukrayna münaqişəsinin uğurla həlli nəticəsində yaranacaq iqtisadi və investisiya imkanlarına uyğun hərəkət etmək məqsədəuyğun hesab edilib. Nəhayət, Ukraynada sülh prosesinin vaxtında və səmərəli şəkildə irəliləyişini təmin etmək üçün hər iki ölkənin komissiyaları tərəfindən hazırlanmış sülh təkliflərinin Putin və Trampa təqdim edilməsi barədə razılıq əldə olunub”.

Bu sözləri xalqcəbhəsi.az-a açıqlamasında siyasi elmlər üzrə fəlsəfə doktoru, politoloq Züriyə Ruslanqızı deyib.

Z.Ruslanqızı əlavə edib ki, bundan əlavə, ABŞ dövlət katibi Rubio tərəflərin Moskva və Vaşinqtondakı səfirlik işçilərinin sayını əvvəlki səviyyəyə qaytarmaq barədə razılığa gəldiyini açıqlayıb: “Amerika rəsmiləri Moskva ilə əlaqələrin artırılmasını Rusiya və Çin arasında nifaq yaratmaq, nüvə rəqibi ilə münasibətləri düzəltmək və saysız-hesabsız insanın ölümünə səbəb olan münaqişəyə son qoymaq üçün cəsarətli cəhd kimi təsvir edirlər”.

O həmçinin bildirib ki, Ər-Riyaddakı danışıqlarda Ukrayna ilə bağlı konkret təkliflər yoxdur: “ABŞ və Rusiyanın sülh planı atəşkəs, Ukraynada seçkilər və daha sonra yekun razılaşmanı əhatə edən üç fazalı prosesi əks etdirir. Rusiyanın Ukraynada seçkilərin keçirilməsini istəməsinin əsas səbəblərindən biri Ukrayna prezidenti Vladimir Zelenskiyə onun legitimliyini şübhə altına alaraq ona təzyiq göstərməkdir. Rusiyanın Ər-Riyad görüşündə gündəmə gətirdiyi məsələlərdən biri də sülh danışıqları ilə paralel olaraq iqtisadi sanksiyaların ləğvi və dondurulmuş Rusiya aktivlərinin sərbəst buraxılması olub. İlk iclasda belə bir tələbin səsləndirilməsi Rusiyanın bu müharibəyə görə iqtisadi çətinliklərlə üzləşdiyini göstərir”.

Röya İsrafilova