“Aprel döyüşləri Qarabağ münaqişəsinin həllində ən ciddi rol oynayan bir faktordur. Aprel döyüşlərində Azərbaycan Ordusu bir daha öz kadr potensialının nədən ibarət olduğunu, hansı gücə malik olduğunu göstərdi. Həm dağlıq, həm düzən ərazidə, quruda, havada, suda necə döyüş aparmağın lazım olduğunu bir daha nümayiş etdirdi. Əsas məsələ də odur ki, erməni ordusu haqqında yaradılan mif sındırıldı. Bir sıra erməni rəhbərlərinin daimi bu istiqamətdə güclərinin daha çox olduğunu, hətta yollara nəzarət etdiklərini demələrinə baxmayaraq Aprel döyüşlərindən sonra Ermənistan ordusunda ciddi istefalar başlandı, korrupsiya halları üzə çıxdı, bununla bağlı yoxlamalar aparıldı, hətta hakimiyyət dəyişikliyi baş verdi. Hakimiyyət dəyişikliyinin əsas səbəblərindən biri məhz Aprel döyüşlərində ermənilərin məğlubiyyəti idi. Lələtəpə yüksəkliyinin, 1000 hektarlarla ərazinin azad edilməsi, sonra həmin ərazilərdə dinc əhalinin yaşaması üçün infrastrukturun yaradılması bir daha göstərdi ki, biz suverenliyimizin, ərazimizin işğal altında qalması ilə heç zaman barışmayacağıq”.

Bu sözləri xalqcəbhəsi.az-a Milli Məclisin deputatı Arzu Nağıyev deyib.

A.Nağıyev diqqətə çatdırıb ki, 2016-cı ilin aprel ayının əvvəlində baş verən Aprel döyüşləri Azərbaycan Ordusunun mühüm qələbəsi ilə nəticələndi: “Tərtər rayonunun Talış kəndi ətrafındakı yüksəkliklər, Suqovuşan kəndi istiqamətində mövqelər, Cəbrayıl rayonunun Lələtəpə yüksəkliyi, Cocuq Mərcanlı, Goranboy rayonunun Gülüstan kəndi istiqamətindəki məntəqələr düşməndən azad edildi. Silahlı qüvvələrimiz “məğbuledilməz erməni ordusu” mifini doğrudan da darmadağın etdi və biz dünyaya göstərə bildik ki, bizim necə gücümüz, necə milli kadr potensialımız var. Vətən müharibəsindəki şanlı Zəfərimizin bünövrəsi qoyuldu. Aprel döyüşlərindən əldə edilmiş təcrübələrdən irəli gələrək 2016-2020-ci illərdə istər Tovuz hadisələri, istər digər məsələlər Azərbaycan Ordusunda yenidənqurma işləri, yeni silahlarla təchiz olunma, təlimlər, hərbi taktikanın təkmilləşdirilməsi, yeni kadr potensialının yetişdirilməsi prosesi getdi və biz müasir müharibənin necə aparılmasını göstərə bildik”.

Məhz Aprel döyüşlərindən başlayan proseslərin 2020-ci ildə Azərbaycanın şanlı Qələbəsi ilə nəticələndiyini bildirən deputat bu döyüşlərdən sonra müxtəlif döyüşlərin olduğunu qeyd edib: “Həm Naxçıvan istiqamətində Günnüt əməliyyatı, həm Tovuz döyüşləri bir daha göstərdi ki, Azərbaycan Ordusu yüksək döyüş qabiliyyətinə malikdir və torpaqlarının 1 qarışını da kiməsə verəsi deyil. Tovuz döyüşlərində də Ali Baş Komandanın qətiyyətinin, Azərbaycan Ordusunun döyüş qabiliyyətinin və Azərbaycan xalqının birliyinin ən yüksək səviyyədə olduğunu gördük. Bu proseslər bu gün deməyə əsas verir ki, Azərbaycan xalqı bilir ki, onun arxasında şanlı bir ordu dayanıb. Həmin ordu istənilən vaxt ərazi bütövlüyümüzü, suverenliyimizi qorumağa qadirdir”.

Röya İsrafilova