Avropa İttifaqının (Aİ) "EU4Energy" enerji komandası Azərbaycanın enerji sektorunun transformasiyasını dəstəkləmək üçün ölkə ilə daimi əməkdaşlıq və dialoqdadır.

Bunu Trend-ə proqramın rəsmi nümayəndə deyib.

"EU4Energy" proqramı Avropa Enerji Tənzimləyiciləri Şurası (CEER), Enerji Birliyi Katibliyi (EnCS) və Beynəlxalq Enerji Agentliyi tərəfindən həyata keçirilir. Biz Azərbaycanın Energetika Nazirliyi, Enerji Məsələlərini Tənzimləmə Agentliyi və Bərpa Olunan Enerji Agentliyi ilə daimi əməkdaşlıq edirik", - deyə nümayəndə bildirib.

Onun sözlərinə görə, mayın 25-də "EU4Energy" komandası ağıllı şəhər/kəndin ümumi konsepsiyasında bərpaolunan enerji mənbələrinin (BEM) rolunu, habelə “ağıllı” şəhərin/kəndin layihələndirilməsi üçün BEM ilə əlaqədar istifadə edilməli olan əlavə xidmətlərin növlərini müzakirə etmək üçün Avropa və Azərbaycan ekspertlərini bir araya gətirən seminar keçirib.
“Ağıllı” şəhərlər/kəndlər konsepsiyası şəhər problemlərini həll etmək və inteqrasiya olunmuş, texnoloji cəhətdən inkişaf etmiş və dayanıqlı infrastruktur yaratmaq üçün innovasiyaların tətbiqinə, təcrübələrin yaradılmasına və təşviqinə yönəlib. Bu, vətəndaşlara və yerli özünüidarəetmə orqanlarına şəhərlərin/kəndlərin ehtiyaclarını ödəmək üçün birgə təşəbbüslər inkişaf etdirməyə və böyüyən şəhər mühitində aktiv və resursları səmərəli idarə etmək üçün ağıllı texnologiyalardan istifadə etməyə imkan verir.

Bundan əlavə, Aİ ekspertləri əsas diqqəti üzv dövlətlər tərəfindən Aİ tələblərinin yerinə yetirilməsi, eləcə də Avstriya və Yunanıstanın qarşıya qoyduğu davamlı inkişaf məqsədlərinin həyata keçirilməsinə yönəldiblər. Məsələn, Vyananın Ağıllı Şəhər Agentliyinin Şəhər İnnovasiyası üzrə eksperti Azərbaycanın şəhər və kəndlərinin smart həlləri necə tətbiq edə biləcəyindən danışıb.

Proqramın nümayəndəsinin sözlərinə görə, onun hazırkı mərhələsi “Şərq Tərəfdaşlığı ölkələrində “təmiz” enerjiyə keçidin təşviqi: II mərhələ” 2024-cü ilin dekabr ayına qədər davam edəcək.