“Şübhəsiz ki, istənilən proqnoz müəyyən risklərə məruz qala bilər. Ona görə qeyd etmək istəyirəm ki, Maliyyə Nazirliyi dövlət büdcəsinin layihəsini hazırlanarkən İqtisadiyyat Nazirliyi tərəfindən tərtib olunan makroiqtisadi proqnozları əsas götürüb. Bildiyimiz kimi, neft qiymətlərinin proqnozunda üç senari var: Optimist, baza və pessimist senari. Bizim büdcə proqnozları baza ssenarisi üzərində qurulub. Baza senarisində isə neftin qiyməti 70 dollar götürülüb. Pessimist senarisində bu qiymət 60 dollar səviyyəsində götürülür”.

APA-Economics” xəbər verir ki, bunu Milli Məclisin Gənclər və idman, İctimai birliklər və dini qurumlar, Mədəniyyət komitələrinin birgə iclasında “Azərbaycan Respublikasının 2025-ci il dövlət büdcəsi haqqında" qanun layihəsinin müzakirəsi zamanı Maliyyə naziri Samir Şərifov deyib.

O bildirib ki, neftin qiyməti düşərsə, Dövlət Vergi Xidməti tərəfindən büdcə daxiolmalarının 340 milyon manat azalması proqnozlaşdırılır: “Bu o qədər də sarsıdıcı fakt ola bilməz. Dövlər Neft Fondunun gəlirlərinə gəldikdə isə təsir daha yüksəkdir. Burada söhbət 2 milyard 100 milyon manatlıq təsirdən gedir.

Cari ilin büdcəsində neftin qiymətini 60 dollardan 75 dollara kimi yüksəltmişik. Növbəti il üçün isə bu qiyməti 5 dollar az götürmüşük. Əgər neftin qiyməti enersə, bu mənfi təsirləri qarşılaya bilmək üçün ehtiyat addımlarımız var”.