Xəzərin Azərbaycan sektorunda yerləşən “Azəri-Çıraq-Günəşli” (AÇG) və “Şahdəniz” yataqları istismara veriləndən 1 fevral 2025-ci il tarixinədək burada 651,9 mln. ton neft (kondensatla birlikdə), 469,6 mlrd. kubmetr qaz hasil edilib.

“APA-Economics” Energetika Nazirliyinə istinadən xəbər verir ki, hesabat dövründə AÇG-dən 602,9 mln. ton neft, 230,8 mlrd. kubmetr qaz, “Şahdəniz”dən isə 49 mln. tona yaxın kondensat, 238,8 mlrd. kubmetr qaz çıxarılıb.

“Bundan 1 fevral 2025-ci il tarixinədək 650 mln. tona yaxın neft, 171 mlrd. kubmetr qaz ixraca nəql edilib”, - məlumatda qeyd olunur.

Məlumata görə, 2025-ci ilin yanvar ayında respublikada 2,3 mln. ton neft (kondensatla birlikdə) hasil edilib. Hasilatın 1,3 milyon tonu AÇG-nin, 0,3 mln. tonu (kondensat) “Şahdəniz”in, 0,05 mln. tonu (kondensat) “Abşeron” yatağının payına düşüb. SOCAR üzrə neft (kondensatla birlikdə) hasilatı 0,6 mln. ton təşkil edib.

Ötən ay ərzində 2 mln. ton neft (kondensatla birlikdə) ixraca nəql olunub. Bunun 1,7 mln. tonu konsorsiumların, 0,25 mln.tonu SOCAR-ın, 0,05 mln. tonu isə “Abşeron” yatağının payına düşüb.

Bildirilir ki, 2025-ci ilin yanvar ayında respublikada 3,9 mlrd. kubmetr təbii qaz hasil edilib. Qazın 1,1 mlrd. kubmetri AÇG-nin, 2 mlrd. kubmetri “Şahdəniz”in, 0,1 mlrd. kubmetri “Abşeron” yatağının, 0,7 mlrd. kubmetri SOCAR-ın payına düşüb.

Hesabat dövründə xaricə qaz satışı 2 mlrd. kubmetr təşkil edib. Bundan 1 mlrd. kubmetr Avropaya, 0,7 mlrd. kubmetr Türkiyəyə, 0,3 mlrd. kubmetr Gürcüstana satılıb. Türkiyəyə TANAP-la bu müddətdə 0,5 mlrd.kubmetr qaz nəql olunub.