“AzerGold” qızıl məhsullarının 1 qramı üzrə qiymətini açıqlayıb İqtisadiyyat

“AzerGold” qızıl məhsullarının 1 qramı üzrə qiymətini açıqlayıb

“AzerGold” QSC-nin qızıl məhsullarının 1 qramı üzrə ortalama qiymət 188,5 manat təşkil edir.

Bu barədə “AzerGold”dan “APA-Economics”in sorğusuna cavab olaraq bildirilib.

Məlumata görə, “AzerGold” tərəfindən yerli qızıl və gümüş xammalından müxtəlif çəki və dizaynlarda hazırlanmış qiymətli məhsulların – qızıl sikkə və külçələrin, gümüş sikkələrin satışı 2019-cu ildən etibarən həyata keçirilir. Qızıl sikkələr müxtəlif dizaynlarda 5,10, 20, 1 unsiya, gümüş sikkələr isə 5,10, 20, 2 unsiya çəkilərdədir. “AzerGold” istehsalı olan ən kiçik qızıl külçə 2 qram, ən böyüyü isə 1000 qram çəkidədir.

“Məhsullarımıza həm unikal hədiyyə seçimi qismində, həm də istənilən zaman milli valyuta ilə mübadilə edilə bilən sərfəli investisiya aləti kimi maraq kifayət qədər böyükdür”, - “AzerGold”dan bildirilirb.

Qeyd olunur ki, “ AzerGold”un qızıl məhsullarının qiyməti Səhmdar Cəmiyyətinin “Külçə və sikkə şəklində qızıl, gümüş məhsullarının və qablaşdırmasının pərakəndə satışı üzrə qiymət siyasəti”nə əsasən, Qiymət Komitəsi tərəfindən Mərkəzi Bankın gündəlik məzənnəsinə uyğun, periodik olaraq nəzərdən keçirilir və təsdiq olunur.