Azərbaycanda istehsal edilən tikinti materiallarının Avropa İttifaqı ölkələrinə ixracı araşdırılır.

Bunu Azərbaycan Tikinti Materialları İstehsalçıları Assosiyasiyasının (ATMİA) Baş Katibi Şahanə Sarı deyib.

O qeyd edib ki, Azərbaycanın tikinti materiallarının Balkan yarımadası vasitəsilə Avropa ölkələrinə ixracı üzərində iş aparılır:

“Hazırda Avropa İttifaqı ölkələrinə ixrac üçün materialların standartı, logistika məsələləri araşdırılır. İlkin qiymət araşdırmasına əsasən, ixrac sərfəli ola bilər".

O, həmçinin Rusiya-Ukrayna müharibəsinin Azərbaycan tikinti sektoruna təsirinə münasibət bildirib: "Hazırda Rusiya ilə ticarətdə ciddi problemlə üzləşməmişik. Rusiyaya Azərbaycanın tikinti materiallarının ixracını artırmaq üçün işlər görürük. Bir neçə ay bundan əvvəl Rusiya Ticarət Müşavirliyi ilə memorandum imzaladıq. Rusiyadan Azərbaycana idxal edilən məhsulun həcmi Azərbaycandan Rusiyaya ixrac edilən məhsulun həcmindən 3 dəfə çoxdur. Biz bunu balanslaşdırmaq üçün sistemli işlərə başlamışıq".

O bildirib ki, Orta Asiya ölkələri Azərbaycan üçün hədəf bazardır: "Bizim bu ölkələrlə ticarətlə bağlı razılaşmalarımız var. Buna görə də şirkətlərimiz bu ölkələrə daha rahat ixrac edə bilirlər. Tikinti məhsullarının daşınması daha çətin olduğuna görə, onların bir ölkədən digərinə ixrac olunan zaman rentabelliyi aşağı düşür".