Bankların ödəniş cədvəlində ilk öhdəliklər üzrə faiz ödənişləri önə salınır. İstehlak kreditlərndə ilk aylar üzrə ödənişlərdə aylıq ödənişin 40 faizə yaxınını faiz ödənişləri təşkil edir.
Bu da vədəndaşlarda haqlı narazılıq yaradır.
Milli Məclisin İqtisadi siyasət, sənaye və sahibkarlıq komitəsi sədrinin müavini Azər Badamov xalqcebhesi.az-a açıqlamasında deyib ki, istehlak krediti götürən hər bir vətəndaş kreditin geri ödənişi ilə bağlı bankla müqavilə bağlayır: “Müqavilədə kreditin ödənilmə qaydaları qeyd olunur və vətəndaş həmin qaydalar üzrə ödənişin edilməsi ilə bağlı öhdəlik götürür”.
O əlavə edib ki, bank da kredit faizini hesablayanda müqavilənin şərtlərinə uyğun hesablayır və kredit bağlayanda əvvəlki ödənişlərin silinməsi və əsas məbləğlə bağlı fikir ayrılıqları meydana gəlir: “Vətəndaş bankla bağladığı müqaviləyə əsasən həm hesablanmış faizi, həm də əsas hissəni ödəyir. Burada uyğunsuzluq baş verirsə ilk növbədə banka müraciət olunmalıdır. Əgər bank müqaviləyə uyğun gəlməyən şəkildə faizləri silərək əsas məbləği saxlayırsa, təbii ki, məhkəməyə müraciət olunmalı və pozulmuş hüquqların bərpasını tələb etməlidir. Amma hesab edirəm ki, banklar vətəndaşlarla bağlanmış müqavilədən kənar hər hansı bir ödəniş hesablamırlar. Sadəcə kredit alanda asan görünür, qaytarılanda isə çətin. Çünki qaytardığı məbləğ aldığı məbləğdən çox olur və bu da vətəndaşın xoşuna gəlmir”.
A.Badamov qeyd edib ki, bunun üçün biz istehlak kreditlərinə meyilli olmamalıyıq.

Röya