Türkiyənin Lüleburgaz rayonunun Evrensekiz qəsəbəsində fermer Burak Tunckol Qarabağ zəfərini qeyd etmək istəyib.

Xalqcebhesi.az xəbər verir ki, bu barədə Türkiyənin “haberglobal.com.tr” saytı məlumat paylaşıb.

Məlumatda qeyd olunur ki, traktoruna Türkiyə və Azərbaycan bayraqlarını asan B.Tunckol torpaqda kotanla iz qoyub və təxminən 4 saat ərzində “Qarabağ Azərbaycandır, Qarabağ zəfəri 4 yaşında” yazıb. Türkiyə ilə Azərbaycanın qardaş ölkə olduğunu vurğulayan B.Tunckol Qarabağ zəfərinin ildönümünü qeyd etdiyini bildirib.

Qarabağ zəfərinin Türkiyəyə də aid olduğunu deyən fermer “İki dövlət, bir millət” fikrini yaşatmaq üçün belə bir iş gördüyünü diqqətə çatdırıb.

O, Qarabağ zəfərində çoxlu şəhid verildiyini bildirərək, "Tarlaya yazı yazarkən hər dəfə kotanı torpağa batırdığımda şəhidləri xatırladım. Şəhidlərimizin məkanı cənnət olsun" deyib.