“İranın Prezident səviyyəsində COP29 tədbirinə qatılmaması, qlobal səviyyədə iqlim dəyişikliyi ilə bağlı prosesdən kənarda qalması onların özləri üçün problemdir. Hər birimiz bilirik ki, COP29 tədbiri 22 noyabradək davam edəcək. Ona görə də düşünmürəm ki, artıq gecdir”.
Bu sözləri xalqcəbhəsi.az-a açıqlamasında Siyasi və Hüquqi Araşdırmalar Mərkəzinin (SHAM) rəhbəri, politoloq Xəyal Bəşirov söyləyib.
Politoloq vurğulayıb ki, bu tədbirə bütün dövlətlər, o cümlədən də qonşularımız ümumilikdə qlobal dünyanın problemlərinin müzakirəsi kimi baxmalıdırlar: “İqlim dəyişikliyi sadəcə bir dövlətin və ya hansısa bir regionun problemi kimi deyil, ümumilikdə dünyanın, bəşəriyyətin və insanlığın problemi kimi dəyərləndirilməlidir. Daşqınlar, qlobal istiləşmə, sel, iqlim dəyişmələri və s. problemlər ümumilikdə dünyanın problemidir”.
X.Bəşirov əlavə edib ki, bütün dünya dövlətləri bu məsələdə birlik nümayiş etdirməlidirlər: “O baxımdan düşünürəm ki, COP29 tədbirində iştirak etməyən dövlətlər əslində Azərbaycana deyil, ümumilikdə dünyaya, bəşəriyyətə, insanlığa hörmətsizlik edirlər. Eyni zamanda, dünyanın və bəşəriyyətin problemlərinə etinasızlıqlarını, laqeydliklərini nümayiş etdirirlər ki, bunun da mütləq şəkildə bir ucu gedib onlara çıxacaq, zərbəsi onlara da dəyəcək. Bu baxımdan yanaşanda bu tədbirdə iştirakın nə dərəcədə vacib olduğunu anlamaq heç də çətin deyil. Düşünürəm ki, qlobal istiləşmənin, Xəzər dənizinin çəkilməsinin və bir sıra digər problemlərin bütün ətraf ərazilərdə olduğu kimi İrana da zərəri böyükdür. Ona görə də İranın Prezident səviyyəsində tədbirdə iştirak etməsi onun özünün maraqları prizmasından vacibdir, əhəmiyyətlidir”.

Röya İsrafilova