“COP29-da uğurlu addımlardan biri iqlim dəyişmələri ilə bağlı fəaliyyətləri maliyyələşdirmək üçün özəl sektorla tərəfdaşlıqda güzəştli və qrant əsaslı fondun yaradılması təşəbbüsüdür. Rəsmi Bakı bu təşəbbüsü irəli sürüb və maraqlı tərəfləri bu prosesə cəlb edib”.

Bunu xalqcebhesi.az-a açıqlamasında “Prioritet” Sosial İqtisadi Araşdırmalar Mərkəzi İctimai Birliyinin sədri, Azərbaycan Milli QHT Forumunun İdarə Heyətinin üzvü Zaur İbrahimli deyib.

Z.İbrahimli bunun Azərbaycanın iqlim dəyişmələrinə ciddi bir töhfəsi olacağını vurğulayaraq əlavə edib ki, eyni zamanda, Azərbaycanın irəli sürdüyü təşəbbüslərdən biri də iqlim dəyişikliyi hədəfləri ilə sülh hədəflərinin birləşdirilməsidir və Azərbaycan bununla bağlı da dünyaya güclü çağırış etdi, bir daha sülhün vacibliyini və Azərbaycanın sülh gündəliyinə sadiq olduğunu dünyanın diqqətinə çatdırdı.

O eləcə də bildirib ki, COP29 Azərbaycanın artan nüfuzunu, beynəlxalq münasibətlərdə güclənən mövqeyini nümayiş etdirir: “Azərbaycanın bu tədbirə yüksək hazırlığı bütün iştirakçılar tərəfindən qeyd olunur. Eyni zamanda, Azərbaycan COP29-da həm özünün iqlim dəyişmələrinin idarə edilməsi üzrə planları, ambisiyaları, gələcək gündəliyi ilə tanış etmək imkanı verir, həmçinin bütün dünya Azərbaycanı yaxından izləyir. Azərbaycan dünyanın diqqət mərkəzinə çevirilib və ən müxtəlif xalqların, ölkələrin, dövlətlərin nümayəndələri Azərbaycanla tanış olurlar, Azərbaycan tarixini, mədəniyyətini öyrənirlər. Bu da bizim ölkəmiz üçün unikal bir şansdır”.

Röya İsrafilova