“Son 2 ildir ki, Ermənistan ciddi şəkildə silahlanır. Balaca Ermənistan hərbi büdcəsini artıq dörd dəfədən çox artırıb. O, son illər Hindistandan hücum silahları alır. Həmçinin Fransa da silahlar verib. Eyni zamanda, bir neçə il bundan öncə Rusiyaya ödədikləri pulun müqabilində də müəyyən silahlar alıblar. Ermənistan hər zaman deyir ki, biz müdafiə üçün silahlar alırıq. Lakin son dövrlər aldıqları silahlar müdafiə deyil, əksinə, hücum silahlarıdır”.
Bunu xalqcəbhəsi.az-a açıqlamasında politoloq Elşad Həsənov söyləyib.
Politoloq Qərbin Ermənistana dəstək olaraq silahlanmasına səbəb olduğunu vurğulayıb: “Eyni zamanda, bu illər ərzində NATO qüvvələrinin təlimatçıları erməni hərbçilərinə təlimlər keçirdilər. Bütün bunlar onu göstərir ki, Ermənistanı müharibəyə hazırlayırlar. Ancaq görünən odur ki, Ermənistanı nə qədər hazırlasalar da, Azərbaycanla balans yarada bilməzlər. Bugünkü reallıq bunu göstərir ki, yaxın 15 ildə Ermənistan nə qədər silahlansa da, onun həm say, həm döyüş qabiliyyəti, həm yeni silahlar cəhətdən Azərbaycan ordusunun səviyyəsinə gəlib çatması mümkün deyil. Azərbaycan Silahlı Qüvvələri son dördüncü, beşinci nəsil silahlara sahibdir və müharibədən sonrakı dövrdə boş dayanmayıb, yeni-yeni hərbi birləşmələr yaradıb. Bilirik ki, düşmənlərimiz yatmayıb, bizə qarşı iş aparırlar və ona görə də öncədən hazırlıqlarımızı görürük”.

Röya İsrafilova