“Ermənistan siyasi hakimiyyəti 44 günlük Vətən müharibəsi və anti-terror əməliyyatları zamanı kifayət qədər canlı və silah-sursat, texnika itkiləri ilə üz-üzə qaldı. Bu da bir dövlətin kəskin şəkildə zəifləməsi və gücsüzləşməsi deməkdir. Bütün bunlar Ermənistan ordusunun arsenalına yeni texnikaların cəlb olunmasına gətirir çıxarır. Çünki kasıb bir dövlətin tədarükə ehtiyacı olur”.
Bu sözləri xalqcəbhəsi.az-a açıqlamasında hərbi jurnalist Anar Şuşalı söyləyib.
O bildirib ki, bütün bunların nəticəsində Ermənistanın sürətlə silahlanaraq, aqressiv ritorikasını davam etdirməsi sülh prosesinə də təhdid törədir: “Azərbaycan və Ermənistan arasında münasibətlərin normallaşdırılması istiqamətində Azərbaycan tərəfindən kifayət qədər addımlar atılıb. Ermənistan tərəfindən isə son dövrlərdə daha intensiv xarakter alan siyasi və hərbi təxribatlar, bu ölkənin sürətlə silahlanaraq aqressiv ritorikasını davam etdirməsi sülh prosesini ləngidir. Ermənistanın hərbi büdcəsini kəskin artırması, həm ənənəvi, həm də yeni təchizatçılardan külli miqdarda hücum silahları alması, keçmiş münaqişəyə əsaslanan tezisləri və strukturları saxlamaq cəhdləri ilə birlikdə konstitusiya dəyişikliklərinin həyata keçirilməsi xüsusunda səhlənkarlığı normallaşma prosesinə xələl gətirir”.

Röya İsrafilova