“Azərbaycan uğurlar əldə etməkdə davam edir. Özünü böyük adlandıran, amma qısqanclıqları və paxıllıqları ilə cılızlıqlarını göstərən dövlətlər bu uğurların əldə olunmasına maneə törədə bilmirlər”.

Bu sözləri Xalqcebhesi.az-a açıqlamasında siyasi şərhçi, Cross Media Təhlil Mərkəzinin analitiki Mübariz Göyüşlü söyləyib.

Siyasi şərhçi əlavə edib ki, dünya və BMT miqyasında olan tədbirin – COP29-un Azərbaycana gətirilməsi, yüksək səviyyədə gerçəkləşdirilməsi paxıllıq hissini daha da artırıb: “Əvvəllər hər zaman Azərbaycan dünyaya gedirdi, indi dünya Azərbaycana gəlir. Dünyanın problemləri Azərbaycanda müzakirə olunur, qərarlar verilir, ölkəmiz dünyanın mərkəzinə çevrilir. Dünyada sülh və ədaləti təmin etməli olanlar gərginlik və müharibə yaratmaqla məşğuldur. Belə məqamda coğrafi baxımdan kiçik görünən bir ölkənin – Azərbaycanın irəli çıxması və qlobal problemlərin həllinə göstərdiyi cəhdlər “böyük”lər tərəfindən qısqanclıqla qarşılanmaqdadır. BMT tədbirinin Azərbaycanda keçirilməsinə 200-ə qədər ölkənin dəstək verməsi, BMT baş katibinin 10 gün ərzində iki dəfə ölkəmizə səfər etməsi, açıqlama və çıxışlar etməsi, onlarla ölkənin on minlərlə təmsilçisinin Azərbaycana səfəri, iqlim probleminin gündəmdə saxlanılması, böyük dövlətlərin biganə siyasətinin, riyakar davranışlarının ifşa edilməsi – bax, onları narahat edən budur”.

M.Göyüşlü vurğulayıb ki, lakin Azərbaycan yolundan dönmək fikrində deyil: “Bu siyasəti və “böyük”ləri “narahat etməkdə” davam edəcəyik. Azərbaycan doğru bildiyi yoldan çəkilməyəcək. Dünyanın ədalətə - Azərbaycan yanaşmasına, bacarıqlı siyasi liderə - İlham Əliyev kimi bacarıqlı siyasətçiyə ehtiyacı var. Biz bundan sonra da dost və müttəfiq ölkələrlə birlikdə dünyaya “Azərbaycan ədaləti” gətirməyə davam edəcəyik”.

Röya İsrafilova