“Prezident İlham Əliyevin bu müsahibəsi də əvvəlki müsahibələr kimi bu günə qədər olan məsələlərə yetərincə işıq tutdu, eyni zamanda da sabahımızla bağlı yol xəritəsi özəlliyi daşıdı”.

Bunu xalqcəbhəsi.az-a açıqlamasında siyasi şərhçi Azər Həsrət deyib.

A.Həsrət vurğulayıb ki, cənab Prezident bütün işlərin önündə gedən bir şəxs, lider olaraq həm Azərbaycan, həm dünyanın taleyi ilə bağlı yetərincə ayrıntılı şəkildə fikirlər bildirdi: “Bizim üçün o müsahibədə deyilən bütün fikirlər əhəmiyyətlidir və hər birisi ayrı-ayrılıqda şərh edilə bilər. Amma mən mənim məşğul olduğum sahə olduğuna görə fikirlərin bəzilərinin üstündə dayanmağı üstün tuturam. Prezident İlham Əliyevin İranla münasibətlər, İranın yeni hakimiyyəti ilə bağlı səsləndirdiyi fikir diqqət çəkəndir. Cənab Prezident burada hələ ki, tam qərarlı bir nəticə olmadığını diqqətə çatdırdı. Bilirsiniz ki, İranda yeni prezident seçildikdən sonra Azərbaycanla münasibətlərin daha uyğun bir müstəviyə yönəldiləcəyi ümidləri vardı, amma bu baş vermir. Ona görə də Prezident İlham Əliyev hələ ki, bu məsələdə qəti fikir söyləməyə tələsmir”.

A.Həsrət bildirib ki, digər tərəfdən Azərbaycan-Türkiyə münasibətləri növbəti dəfə Prezidentin dilindən bizim bədxahlarımız üçün kifayət qədər açıq şəkildə səsləndirildi: “Prezident qeyd elədi ki, Türkiyənin xeyrinə olan nə varsa, bizim xeyrimizdədir. Yəni Türkiyə haradadırsa, biz də oradayıq. Özəlliklə də Yaxın Şərq, Suriya məsələsində Azərbaycan Prezidenti birmənalı mövqe ifadə etdi”.

Röya İsrafilova