“ABŞ-nin 47-ci Prezidenti Donald Tramp rəngarəng şəxsi keyfiyyətləri, seçki öncəsi verdiyi qəti vədlər kimi inaqurasiya mərasimindən sonra atdığı hər bir addım nəinki geniş rezonans doğurur, hətta ABŞ-dən çox uzaqda yerləşən ölkələrə, xalqlara belə fundamental təsir edir. Bu, USAID-in bağlanması ilə əlaqədar olsa da, bu məqamda fikri cənab Prezident İlham Əliyevin Çin televiziya kanalına verdiyi müsahibəsinə yönəltmək istəyirəm. Dövlət başçımızın fikirlərindən belə məlum oldu ki, Bayden zamanında son dörd ildə ABŞ ilə Azərbaycanın korlanmış münasibətlərində yeni səhifənin açılması perspektivləri var. Bunu ona görə vurğulayıram ki, bəli, məhz Bayden və Blinkenə bağlı olan Samanta Pauer idi ki, Vardanyanın oğlu və onlara yaxın biznesmenlərlə birləşərək nüfuzlu media qurumları vasitəsilə Azərbaycanın əleyhinə kampaniya aparır, kirli biznes şəbəkəsi ilə şöhrət qazanan Vardanyanın həbsdən çıxması üçün canfəşanlıq edirdilər”.

Bu sözləri Xalqcebhesi.az-a açıqlamasında siyasi elmlər üzrə fəlsəfə doktoru, politoloq Şəbnəm Həsənova deyib.

Ş.Həsənova vurğulayıb ki, Azərbaycanın daxili işlərinə qarışmaq, imicinə zərbə vurmaq, düşmənlərinin əlinə su tökmək milli maraqlar üzərindən yürüdülən siyasəti “digər aktorlardan asılılıq” kimi təqdim etmək bu şəbəkənin birgə təxəyyülünün məhsulu idi: “Azərbaycan isə USAID-in də, Pauerin də əməllərini elə məhz Bayden və Blinkenin dönəmində də ifşa edirdi. Azərbaycan etnik təmizləməyə məruz qalan ölkə olsa da heç zaman kirli siyasətə əl atmadı. Müzəffər Ali Baş Komandanımızın ədalətli siyasəti daxildə də, xaricdə də bələdçiyə ehtiyac duyulmayan siyasətdir. S.Pauerin, Vardanyanın, bütün məkrli qüvvələrin Azərbaycanı, onun Liderini gözdən salmaq cəhdlərinin qarşısında heç kim deyil, məhz xalq dayanır. USAID-in yeri isə tarixin zibilliyidir”.

Röya İsrafilova