Azərbaycan xalqı son illərdə tarixinin ən qürurlu anlarını yaşayır. 2020-ci ildə Vətən müharibəsindəki qələbə ilə suverenlik bayrağını göylərə qaldıran ölkəmiz, bu gün təkcə torpaqlarını deyil, siyasi arenada birliyini də zəfərlərlə bəzəyir. Prezident İlham Əliyevin qətiyyəti ilə başlayan bu yeni səhifə, hərbi gücümüzün möhtəşəm təsdiqi ilə yanaşı, artıq siyasi dialoqun səsiylə də yazılmağa davam edir. Xankəndi, Xocalı və Əsgərana səfər edən siyasi partiya liderlərinin birgə addımları, bu prosesin ürəkaçan sübutudur. 2025-ci ilin “Konstitusiya və Suverenlik İli” elan olunması isə qalibiyyətin daha mühüm, konstitusion nəticəsidir– Azərbaycanın öz gücünü dünyaya bir daha göstərəcəyi anın hüququn ifadəsidir.

İlham Əliyev bu olimpiadanın əsas qəhrəmanıdır. O, 44 gün ərzində düşməni diz çökdürərək torpaqlarımızı geri qaytardı. O, bütövlükdə ölkənin bütün təbəqələrinin şərtsiz lideri kimi eyni nöqtədə dayanmayaraq, siyasi meydanın tanınmış simalarını da qələbəsi ətrafında daha möhkəm formada topladı.
Xankəndidə partiya rəhbərlərinin görüşü, əslində bir yumruq kimi birləşən Azərbaycanın simvoludur. Bu, sadəcə səfər deyil, keçmişin yaralarını sağaldıb gələcəyə ümidlə baxan bir xalqın manifestidir. Çox az müddət bundan əvvəl Xankəndi meydanında ölkəmizi parçalamış, xalqımızın qanına susamış separatçıların səsi eşidilir, qondarma parad oyunları təşkil edilir, əzəli-əbədi yurd yerlərimizdə bizə gözdağı verirdilər. Bugün Xankəndi meydanı elə bir rol oynayır ki, siyasi dialoq burada soyuq protokollardan çıxıb, isti bir həmrəylik səhnəsinə çevrilib. Əsgəranın daşlarında tarix, Xocalının torpağında ədalət, Xankəndidə isə qürur var – və bu üçü birləşərək Azərbaycanı yenidən doğulmuş bir ulduza çevirir, Bakıda isə Xankəndi meydanında bir zamanlar cığallıq edən düşmən terrorçuları ədalət mühakiməsi qarşısında cavab verirlər.

2025-ci il isə dövlət olimpiadasının final mərhələsidir. Konstitusiyamızın 30 illik şərəfi və qələbəmizin 5 illik coşqusu ilə biz dünyaya deyirik ki, “Biz buradayıq, birik və güclüyük!” Xocalının bərpa olunan evləri, Xankəndinin turizm xəyalları – bunlar suverenliyin sadəcə xəritədəki xətlər deyil, həyatda nəfəs alan bir reallıq olduğunu göstərir. Dialoqla toxunan bu zəfər, Azərbaycanı təkcə regionun lideri deyil, həm də birlik dərsi verən bir ölkə edir.
İlham Əliyev adı Azərbaycanın müasir tarixinin qürur səhifələrində qızıl mürəkkəblə yazılıb. O, təkcə torpaqlarımızı işğalın zəncirlərindən qurtarmadı, həm də suverenliyimizi siyasi arenada, iqtisadi meydanda və mədəni səhnədə nəhəng bir abidəyə çevirdi. Xankəndidə hərbi paradın üçüncü ildönümündə Zəfər meydanında toplanan siyasi partiya rəhbərləri, bu qələbənin sadəcə dövlətin deyil, hər bir Azərbaycanlının ürəyindən doğan bir zəfər olduğunu ifadə etdilər. İlham Əliyev faktoru, xalqımızı parçalanmışlıqdan xilas edib vahid bir ailəyə çevirən sehrli bir toxunuşa döndü. Onun təşəbbüsləri ilə siyasi partiyalar arasında dialoq körpüləri quruldu, müxalifət və iqtidar bir stol arxasında əl-ələ verdi. Bu, suverenliyimizin təkcə sərhəd dirəklərində deyil, daxildəki həmrəylik ocağında da alovlandığını göstərir. 2025-ci ilin “Konstitusiya və Suverenlik İli” elan olunması isə bu ruhun bayrağına çevrilib.

Həqiqətən də İlham Əliyev sadəcə lider deyil, o, Azərbaycanın yenidən doğuluşunun memarıdır. 2020-ci ildə 44 günə sığan Vətən müharibəsi, onun qətiyyətinin və uzaqgörənliyinin sübutu oldu. Torpaqlarımız işğaldan azad edildi, amma O, burada dayanmadı – o, suverenliyi dövlət həyatının, millətin həyatın hər sahəsinə yaydı. Xankəndidəki Zəfər meydanı indi təkcə parad meydanı deyil, xalqın birliyinin səhnəsidir. Bu, Əliyevin yaratdığı bir möcüzədir – o, siyasəti soyuq mübahisələrdən çıxarıb, isti bir vətən sevgisinə çevirdi. Xocalının yenidən qurulması, Əsgəranın tarixi abidələrinin dirçəlişi və s. bunlar onun imzasını daşıyan gələcək planlarıdır.
Əliyevin dialoq təşəbbüsləri, Azərbaycanı regionda fərqli bir ölkəyə çevirib. Müxalifətlə iqtidarın birgə səfərləri, sadəcə protokol görüşləri deyil, xalqın gücünü bir yumruqda birləşdirən addımlardır. Xankəndidən gələn görüntülər, siyasi rənglərin təkcə bayraqda deyil, ideallarda da birləşdiyini göstərir. Bu, suverenliyin yeni tərifidir – sərhədləri qorumaqla yanaşı, cəmiyyəti qucaqlamaq. 2025-ci ilin adı budur. Konstitusiyamızın 30 illik yubileyi, qələbəmizin 5 ili ilə birləşərək dünyaya bir mesaj verir: Azərbaycan təkcə torpaq deyil, bir ruhdur!
İqtisadi dirçəliş də Əliyevin suverenlik vizyonunun parçasıdır. Xankəndinin turizm mərkəzinə çevrilməsi, iş yerlərinin açılması – bunlar sadəcə plan deyil, xalqın gələcəyə inamla baxmasının təminatının adıdır. Əliyev, suverenliyi kağız üzərindəki hüquqdan çıxarıb, hər kəsin həyatına toxunan bir gerçəkliyə çevirdi. Onun liderliyi ilə siyasi dialoq, partiyaları rəqibdən çox, idelların yol yoldaşına çevirdi.

Azərbaycanda siyasi dialoq artıq bir ritualdan çox, canlı bir hərəkata çevrilməyə başlayıb. Prezidentin dəstəyi ilə bu yol hər gün yeni rənglər qazanır. Xankəndiyə, azad torpaqlara edilən səfərlər, siyasi partiya liderlərinin beşinci birgə addımı oldu və bu, sadəcə görüş deyil, gələcəyə atılan bir körpüdür. Əsgəran qalasının daşlarında tariximizi eşidən, Xocalıda soyqırımı memorialının yüksəlişinə şahid olan, Xankəndidəki Zəfər meydanında fikir paylaşan bu liderlər, dialoqun əsas siamlarına çevrilirlər. Fikir ayrılıqları ola bilər, amma milli maraqlar və dövlətçilik kimi dəyərlər hamını bir bayraq altında toplayır.
Prezident Administrasiyasından Ədalət Vəliyevin “vətənpərvərlik və dövlətçilik bizim təməlimizdir” sözləri, bu hərəkatın kökünü, özülünü açıqlayır. Siyasi partiyalar ölkənin, ortaq məqsədə – Azərbaycanın yüksəlişinə xidmətə qoşulublar.
Yeni siyasi mədəniyyət başqa formada bu dialoqla özünü büruzə verməkdədir.

Azad torpaqların nəqliyyat coğrafiyası da çox qəribə bir formadadır, yollar siyasi coğrafiyanın xəritəsini yaşadaraq, qalibiyyəti hiss etdirir, Xocalıya həyat qayıdır, Xocavəndin fatehlərinin “əl işləri” yaxın keçmişin qürururun bir daha oyadır, Şuşada Qarabağ tarixinin zirvəsinə şahid olduqdan sonra mütləq bu mühüm marşrut dövlətimizin baş planında tamamlanmalıdır. Xankəndi - Qarabağ xanlarının evi, yurdu, 300 illik tarixin qısa mündəricatı, erməni millətçiliyinin vurduğu yaralar və nəhayət, qalibiyyətin gətirdiyi təntənə. Burda artıq gənclik, uşaqlar, təhsil, elm, univeristet- bir sözlə, qaynar həyat müşahidə edilməkdədir. Qarabağın azadlığı bizim Suveren azaldığımızı əbədiyyən təsis etmiş oldu.
2025-ci ilin “Konstitusiya və Suverenlik İli” sadəcə təqvimdəki bir rəqəm deyil, Azərbaycanın özünü yenidən tapdığı bir dönüm nöqtəsidir. 1995-ci ildə doğulan Konstitusiyamızın 30 illik yubileyi və 2020-ci ildəki zəfərimizin 5-ci şənliyi bu ili qızıl hərflərlə bəzəyir. Suverenlik ili bizə şərəfli bir mesaj ötürür: müstəqilliyimiz təkcə cəbhədə qılıncla qazanılmayıb, siyasi birliyin və iqtisadi yüksəlişin toxumlarıyla çiçəklənib. Dağların sərin nəfəsi, meşələrin yaşıllığı, çayların şırıltısı – bu ərazilər yeni hotellər, istirahət məkanlarıyla həm xalqımıza, həm də qonaqlara qucaq açacaq. Bu, sadəcə maddi olaraq da qazanmaq deyil, Qarabağın ürəyinin yenidən atmasıdır.

Bu ilin zərurəti keçmişlə gələcəyin kəsişməsindədir. Biz yaraları sararkən, önümüzə daha böyük ümidlə baxırıq. 2020-ci ilin qələbəsi torpaqlarımızı geri qaytardı, amma 2025-ci il bu torpaqların böyük qayıdışla daha da yaşamladolacağını vəd edir.
Xankəndi səfərindən sonra siyasi liderlərin dilindən düşməyən möhtəşəm fikirlər, təəsüratlar Azərbaycanın pozitiv gündəmini təşkil edir. 2025-ci il bu dirçəlişin adıdır-Konstitusiyamızın qüruru və birliyimizin coşqusu ilə!
Azərbaycan İlham Əliyevin rəhbərliyi ilə zəfər marşını oxuyur. Siyasi dialoqla toxunan suverenliyimiz, 2025-ci ildə yeni bir yüksəlişə hazırlaşır. Xankəndidən Xocalıya uzanan bu yol, təkcə torpağın deyil, ruhumuzun da azadlığıdır. Bu səfərlər, keçmişin izlərini silmədən, üzərinə gələcəyin planlarını çəkir. Suverenlik ili bizə bir dərs verir: birliyimizlə hər daşı yerindən oynada bilərik!

Züriyə Ruslanqızı
Siyasi elmlər üzrə fəlsəfə doktoru, politoloq