“2016-cı ilin Aprel döyüşlərinə qədər Azərbaycanla Ermənistan arasında belə bir mənzərənin şahidi idik: erməni qalib, erməni Azərbaycan torpaqlarını işğal edib, Azərbaycanın 1 milyon qaçqın və köçkünü var, Qərb dövlətləri Ermənistanı müdafiə edir. Heç bir Qərb dövləti Ermənistanı işğalçı dövlət kimi tanımır və işğal edənlə işğal olunan arasında fərq qoyulmur. İlk nəzərdən hamıya belə gəlirdi ki, 1991-ci ildən sonra 2016-cı ilə qədər hadisələr öz əvvəlki axarı ilə gedir. Yəni Ermənistan qalib, Azərbaycan isə məğlubdur. Ancaq 2016-cı ilin Aprel döyüşləri göstərdi ki, xeyr, Azərbaycan 90-cı illərin əvvəllərinin Azərbaycanı deyil, Ümummilli lider Heydər Əliyev tərəfindən Azərbaycanın gücləndirilməsi ilə bağlı mümkün olanlar bugünkü Azərbaycanın dövlət başçısı Ali Baş Komandan İlham Əliyev tərəfindən uğurla inkişaf etdirilir. Təsadüfi deyil ki, Aprel döyüşləri bütün dünyaya bir qığılcım kimi yayıldı. Azərbaycan səbr nədir onu bilir, səbrin həddi var. Artıq nə Ali Baş Komandan, nə onun əsgəri, nə də Azərbaycan xalqı erməni işğalı ilə razılaşmır və erməni işğalına son qoymaq üçün yollar axtarır. Təbii ki, 2016-cı ilin Aprel döyüşlərində ilk dəfə olaraq Azərbaycan tərəfi ermənilərin ordusu ilə bağlı təbliğ etdikləri o yalanı ifşa etdi. Guya erməni ordusu məğlubedilməz ordudur, guya erməni ordusuna heç kim qalib gələ bilməz. Lakin Aprel döyüşləri bu mifi aradan qaldırdı”.

Bu sözləri xalqcəbhəsi.az-a açıqlamasında Milli Məclisin deputatı, professor Anar İsgəndərov deyib.

Deputat vurğulayıb ki, Aprel döyüşləri Azərbaycan xalqının özünə olan inamını artırdı: “Yəni xalq iqtidar ətrafında, dövlət başçısı ətrafında daha sıx birləşərsə, onun nəticəsi olacaq. Bu nəticə o ola bilər ki, Azərbaycan öz torpaqlarını düşməndən geri ala bilər, öz suverenliyini, bütövlüyünü təmin edə bilər. Doğrudan da bu mənada Aprel döyüşləri Azərbaycan xalqının taleyində və tarixində böyük rol oynadı. Hətta dünənə qədər Azərbaycanın uğuruna inanmayan Qərb də əl-ayağa düşdü. Ermənilərin özü də başa düşdülər ki, artıq Azərbaycanla bacarmaq olmaz, Azərbaycan bu gün məğlub dövlət sayılsa da, sabah öz qələbəsini bütün dünyaya göstərəcək. Həqiqətən də 44 günlük Vətən müharibəsi üçün ilk bünövrə 2016-cı ilin Aprel döyüşləri oldu. O zaman Azərbaycan öz torpaqlarının böyük bir hissəsini geri aldı. Torpaq, vətən uğrunda şəhid olan əsgərlərin və zabitlərin davranışları da bir möcüzə idi. Hər bir əsgər, hər bir zabit təki vətənini, torpağını düşmən işğalından azad etsin deyə şəhadət şərbətini içməyə hazır olduğunu göstərdi. Bu mənada illər keçəcək, amma 2016-cı ilin Aprel döyüşləri və bu döyüşlərdə qəhrəmanlığını göstərən insanların şücaəti heç vaxt yaddan çıxmayacaq. Eyni zamanda, Aprel döyüşləri onu da göstərdi ki, Azərbaycana rəhbərlik edən Ali Baş Komandan Azərbaycanı qalib dövlətlər sırasına çıxarmaq üçün mümkün olanları edir”.

A.İsgəndərov dünyanın ən müasir silahlarını almaq üçün Əsrin müqaviləsinin Azərbaycan ordusunun köməyinə çatdığını deyərək əlavə edib ki, artıq Əsrin müqaviləsinin imzalanması ilə Azərbaycan nefti dünya bazarına çıxarıldı və bu neftdən gələn gəlirlə Azərbaycan ən müasir silahlara sahib oldu: “Azərbaycan əsgəri artıq qələbəni əldə etmək, uğur qazanmaq üçün hər işə qadir idi. Ali Baş Komandan öz qətiyyəti, cəsarəti ilə dünyaya nümunə idi. Onun yetişdirdiyi əsgər Ali Baş Komandandan əmr gözləyirdi ki, əsgər, vətəni azad etmək məqamıdır. Doğrudan da Aprel döyüşlərindən başlanan bu mücadilə 2020-ci ilin sentyabrında daha uğurla davam etdirildi və 44 günlük Vətən müharibəsi ilə düşmən darmadağın edildi. 2023-cü ilin antiterror əməliyyatı ilə Azərbaycan öz dövlət suverenliyini bərpa etdi və üçrəngli bayrağı Azərbaycanın bütün bölgələrində şərəflə dalğalanmağa başladı. Bu qələbənin ilk işartıları təbii ki, 2016-cı ilin Aprel döyüşləri ilə bağlıdır”.

Röya İsrafilova