“Yenilməz Azərbaycan Silahlı Qüvvələrinin şanlı tarixi qələbəsi olan Aprel döyüşlərindən düz 9 il ötür. 9 illik zaman kəsiyində 2016-cı ilin 4 günlük müharibəsinə qiymət verərkən ilk növbədə onu söyləmək lazımdır ki, bu qələbə dövlətimizin, ordumuzun, xalqımızın gücünü nümayiş etdirdi. Bu, tarixi bir qələbədir. Azərbaycan Prezidenti cənab İlham Əliyevin təbirincə desək, Aprel döyüşləri nəticəsində Cəbrayılın, Füzulinin, Ağdərənin işğaldan azad olunmuş ərazilərində Azərbaycan bayrağı dalğalanır. Bu qələbə bir daha sübut etdi ki, Azərbaycan xalqı, dövləti heç bir zaman torpaqlarının işğal altında qalmasına imkan verməyəcək”.

Bu sözləri xalqcəbhəsi.az-a açıqlamasında Milli Məclisin deputatı Elman Nəsirov deyib.

Deputatın sözlərinə görə, 2020-ci ildə İkinci Qarabağ müharibəsində qazandığımız tarixi qələbədən, 2023-cü ildə həyata keçirilmiş antiterror əməliyyatlarından, suverenliyimiz tam bərqərar olduqdan sonra bir daha Aprel döyüşlərinin dəyərini, qiymətini bilmək mümkündür: “Çünki o vaxta qədər içimizdə bir nisgil vardı ki, doğrudanmı arxasında böyük güclərin dayandığı və ordusu haqqında miflərin formalaşdırıldığı Ermənistan silahlı qüvvələrinə qalib gəlmək mümkündürmü? ümumiyyətlə, bu problemin, münaqişənin həlli yolu varmı? Aprel döyüşləri bütün bu sualların dəqiq, dürüst cavabını verdi. Cavab da o oldu ki, bəli, Müzəffər Ali Baş Komandanı, yenilməz ordusu, dəmir yumruğa çevrilmiş xalqı olan bir dövlət hər şeyə qadirdir. Bu birlik sayəsində biz bütün torpaqlarımızı işğaldan azad etdik. Amma onun dadını biz Aprel döyüşlərində gördük. Cəbrayılın, Füzulinin, Ağdərənin təxminən 2 min hektardan artıq ərazisi işğaldan azad olundu. Lələtəpə kimi strateji əhəmiyyətli bir yüksəklik işğaldan azad edildi və orada bizim bayrağımız dalğalanmağa başladı”.

E.Nəsirov qeyd edib ki, Aprel döyüşlərində Azərbaycan Ordusunda, Azərbaycan xalqında tam əminlik hasil oldu ki, biz hərbi yolla öz torpaqlarımızı geri qaytarmağı bacaran xalqıq: “Aprel döyüşləri həm də Azərbaycanın yenilməz ordusu olduğunu nümayiş etdirdi. O ordunun əsgər və zabiti Vətən yolunda canını fəda etməyə hazırdır. Bunu da bütün dünyaya nümayiş etdirdi. Bu ordunun qarşısını heç kim ala bilməz, qarşısına sədd çəkə bilməz. Sayından asılı olmayaraq istənilən istehkamı bu ordu darmadağın etməyə qadirdir. Hesab edirəm ki, 2016-cı ilin aprel ayında 4 günlük müharibənin gedişatında qazanılmış qələbə əslində 2020-ci ildəki tarixi Zəfərə yol açmış oldu. 2016-cı ilin Aprel döyüşləri tarixi Zəfərin bir qaranquşu, müjdəçisi idi və Azərbaycan Ordusu sözün həqiqi mənasında tarix yazdı, tarixi ədaləti, beynəlxalq hüququ bərpa etdi”.

Deputat tarixi ədalətin bərpası nəticəsində bizim həm də beynəlxalq hüququn keşiyində dayandığımızı diqqətə çatdırıb: ”Biz dünyaya nümayiş etdirdik ki, məğrur xalqıq, heç bir zaman işğalla barışmayacaqdıq və barışmadıq da. Bu reallığı dünya dərk etsin. Bilsin ki, Azərbaycan xalqı müdrik, sülhsevər xalqdır, amma bir şərtlə ki, onun torpağını işğal etmək, bu torpağa qarşı çirkli əlləri uzatmaq olmaz. Uzadarsan, o zaman bu xalq cavabını verər. Necə ki, elə 2016-cı ildə, 2020-ci ildə bunu etdi və sözün həqiqi mənasında yeni bir tarix yazdı”.

Röya İsrafilova