“Ermənistanın Avropa İttifaqına inteqrasiyası, sonrakı prosesdə üzvlük məsələsi son zamanlar tez-tez dilə gətirilən mövzulardandır. Almaniya tərəfi də bu məsələdə fikir bildirib. Amma mən Almaniyanın bu məsələdə diplomatik davrandığını düşünürəm. Ermənistanı Qərbə inteqrasiya və Rusiyadan uzaqlaşdırma yolunda şirnikləşdirici addımlar atdığının qənaətindəyəm. Yəni realda Almaniya özü də yaxşı başa düşür ki, Ermənistan kimi siyasi baxımdan qeyri-sabit, iqtisadi baxımdan zəif və mübahisəli bir regionda yerləşən ölkənin Avropa İttifaqına inteqrasiyası İttifaq üçün heç bir gələcək vəd etmir. Düz məntiqlə fikirləşdikdə, birincisi, Ermənistan Avropa İttifaqına niyə üzv olmalıdır?, ikincisi, isə bu üzvlük Avropa İttifaqına nə qata bilər? Aydın məsələdir ki, bu üzvlük Avropa İttifaqına heçnə qatmayacaq, Ermənistana isə nəsə qata bilər”.

Bunu xalqcəbhəsi.az-a açıqlamasında siyasi şərhçi Turan Rzayev deyib.

T.Rzayev bildirib ki, Ermənistan iqtisadiyyatı Avropa İttifaqının gətirəcəyi üstünlüklər, dividentlər və inkişaf etmiş Avropa ölkələrinin iqtisadiyyatları hesabına inkişafa nail olmaq hədəfləyir ki, bu, Moldovanın, Gürcüstanın, Ukraynanın da Avropa İttifaqına üzvlüklə bağlı başlıca səbəbləridir: “Amma reallıq ondan ibarətdir ki, Ermənistanla Azərbaycan arasında sülh imzalanmayıb, münaqişə hələ də davam edir və paraleldə Ermənistan şərti dövlət sərhədində təxribatlar törədir, əlavə qüvvələr cəmləyir, texnika yerləşdirir. Belə bir zamanda Ermənistanla sülh imzalanması bir qədər gecikir və belə olan təqdirdə də Avropa İttifaqına Ermənistanın üzvlük məsələsi o qədər də real görünmür. Yenə də deyirəm Avropa İttifaqına üzv olmaq üçün güclü iqtisadiyyata sahib olmaq, Avropanın tələblərini yerinə yetirmək lazımdır. Həmçinin münaqişə vəziyyətində olmamalısan, siyasi baxımdan sabit olmalısan. Bütün bunlar Ermənistanda təmin edilmədiyi təqdirdə Ermənistanın Avropa İttifaqına üzvlük məsələsi real deyil”.

Siyasi şərhçi Almaniya Prezidenti Frank-Valter Ştaynmayerin Ermənistana Avropa İttifaqına üzvlük yönündə dəstək verməklə bağlı qərarının isə sadəcə diplomatik bir gediş olduğunu, bunda o qədər də reallıq payının olmadığını deyib: “Tutaq kİ, Ermənistanın Avropa İttifaqına üzvlüklə bağlı Almaniya bu və ya başqa formada dəstək ifadə etdi. Axı, digər tərəfdən Avropa İttifaqında bu tipli məsələlər kollektiv qərarlarla verilir. Avropa İttifaqının üzvü olan bir çox ölkələr Ermənistan kimi ölkələrin Avropa İttifaqına üzvlüyündə maraqlı deyil. Onsuz da Avropada kifayət qədər problemlər var. Yəni söhbət inkişaf etmiş Avropa ölkələrinin belə inkişaf etmiş ölkə standartlarında problemlərlə üzləşməsindən gedir. Misal üçün, bu gün İtaliya, İspaniya, Portuqaliya kimi ölkələr Avropa İttifaqının üzvüdür, amma öz çaplarında ciddi iqtisadi problemlər yaşayırlar. Təbii ki, bu ölkələrin ümumdünya iqtisadi payları, göstəriciləri çox yüksəkdir. Yəni önəmli bir ölkələrdir. Lakin buna baxmayaraq Avropa İttifaqı daxilində çox ciddi problemlər yaşayırlar. Hətta ABŞ-nin son zamanlar Avropadan qoşunlarını çəkəcəyinə dair məlumatlar da yayılıb. Bu isə Avropa İttifaqının və NATO-nun xərclərinin artırması deməkdir. Belə olan təqdirdə də növbəti iqtisadi problemlərlə üzləşə bilərlər və nəticə etibarı ilə də əlavə xərc yaradacaq üzvlüklər istəmirlər”.

Röya İsrafilova