Bu günlərdə ABŞ-ın Azərbaycandakı müvəqqəti işlər vəkili Hüqo Gevara Bibiheybət neft parkını gəzərək dünyanın ilk sənaye neft quyusuna baxış keçirib.

Xalqcebhesi.az xəbər verir ki, bu haqda ABŞ-ın ölkəmizdəki səfirliyinin “X” hesabında məlumat verilib.

Gevara gəzinti ilə bağlı bunları deyib:

“Azərbaycanın müstəqilliyinin ilk illərindən bəri ABŞ onun enerji ambisiyalarına davamlı dəstək verib və bu dövrdə regionun enerji xəritəsini yenidən formalaşdıran layihələrdə mühüm rol oynayıb. Belə layihələrdən biri Avropanın enerji təhlükəsizliyini və müxtəlifliyini inkişaf etdirən Cənub Qaz Dəhlizidir. Bu gün ABŞ və Azərbaycan şirkətləri enerji hasilatının səmərəliliyi və təhlükəsizliyini artırmaq üçün əməkdaşlıq edir və bu kimi təcrübə Azərbaycana qlobal enerji təchizatçısı olaraq əhəmiyyətini inkişaf etdirməyə kömək edir.”