“COP29 mötəbər bir tədbirdir. Tədbirdə təxminən 70 mindən çox qonaq və rəsmi nümayəndələr iştirak edir”.

Bunu xalqcebhesi.az-a açıqlamasında ADA Universitetinin prorektoru, Milli Məclisin deputatı Fariz İsmayılzadə söyləyib.

Deputat bu gün 3 müxtəlif panel müzakirələrdə iştirak etdiyini diqqətə çatdırıb: “Birincisi, Türkiyə pavilyonunda türkiyəli millət vəkilləri ilə bir yerdə iqlim dəyişiklikləri mövzusunda parlamentlərin rolu barədə danışdıq. İkincisində vətəndaş cəmiyyəti və özəl sektor əməkdaşlığı panelində iştirak etdim, üçüncüsü isə bizim millət vəkilləri ilə bir yerdə parlament perspektivləri barədə danışdıq. Ümumiyyətlə, Azərbaycan hazırda dünya diplomatiyasının özəyidir. Bütün diqqətlər buradadır və planetimizin gələcəyi də bu COP29 sammitində həll olunur. Azərbaycan tədbirə çox yüksək səviyyədə hazırlaşıb və beynəlxalq standartlara uyğun tədbir təşkil edib. Bu tədbirin bizim diplomatiyamıza və xarici siyasətimizə çox böyük töhfəsi olacaq. Həmçinin Azərbaycan bu tədbir nəticəsində uzunmüddətli dividendlər qazanacaq”.

Röya İsrafilova